ലോക്സഭാ തിരഞ്ഞെടുപ്പിലെ വൻ വിജയത്തിന് നന്ദി പറഞ്ഞ് ഹൈബി ഈഡൻ

കൊച്ചി∙ ലോക്സഭാ തിരഞ്ഞെടുപ്പിലെ തിളക്കമാർന്ന വിജയത്തിന് നന്ദി പറഞ്ഞ് ഹൈബി ഈഡന്റെ വാഹന പര്യടനം ആരംഭിച്ചു. തിങ്കളാഴ്ച രാവിലെ വൈപ്പിൻ നിയോജക മണ്ഡലത്തിലെ മുനമ്പത്തു നിന്ന് ആരംഭിച്ച പര്യടനം ചൊവാഴ്ച കളമശ്ശേരി നിയോജകമണ്ഡലത്തിലായിരുന്നു. രാവിലെ 7 മുതൽ രാത്രി 10 വരെയാണ് പര്യടനം. 12ന് കൊച്ചി, 13ന് എറണാകുളം, 14ന് തൃപ്പൂണിത്തുറ, 15ന് പറവൂർ, 16ന് തൃക്കാക്കര നിയോജക മണ്ഡലങ്ങളിലും പര്യടനം നടക്കും.

കഴിഞ്ഞ 5 വർഷക്കാലം എറണാകുളം പാർലമെന്റ് മണ്ഡലത്തിൽ നടപ്പാക്കിയ വികസന, ക്ഷേമ പ്രവർത്തനങ്ങൾക്ക് ലഭിച്ച അംഗീകാരമാണ് ലോക്സഭാ തിരഞ്ഞെടുപ്പിൽ ലഭിച്ച വലിയ ഭൂരിപക്ഷമെന്ന് ഹൈബി ഈഡൻ പറഞ്ഞു. കൂടുതൽ ഉത്തരവാദിത്തമാണ് ഈ ഭൂരിപക്ഷം നൽകുന്നത്. ജനോപകാരപ്രദമായ ഒട്ടനവധി പദ്ധതികളുമായി ഇനിയും കൂടെയുണ്ടാകുമെന്നും അദ്ദേഹം കൂട്ടിച്ചേർത്തു.