കൊതുകിനെ തേടിയെത്തി; വനിതാ ഹെൽത്ത് ഇൻസ്പെക്ടറെ എതിരേറ്റതു മൂർഖൻ പാമ്പ്!

ആലുവ∙ കെഎസ്ആർടിസിയുടെ തായിക്കാട്ടുകര റീജനൽ വർക്‌ഷോപ്പിൽ കൊതുകു പരിശോധനയ്ക്ക് എത്തിയ വനിതാ ഹെൽത്ത് ഇൻസ്പെക്ടറെ എതിരേറ്റതു മൂർഖൻ പാമ്പ്! പ്രദേശത്തു ഡെങ്കിപ്പനി വ്യാപകമായതിന്റെ കാരണം കെഎസ്ആർടിസി വളപ്പിൽ കൂട്ടിയിട്ടിരിക്കുന്ന നൂറുകണക്കിനു ടയറുകൾക്കുള്ളിലെ വെള്ളത്തിൽ വളരുന്ന കൊതുകു പടയാണെന്ന പരാതിയെ തുടർന്നു ചൂർണിക്കര പഞ്ചായത്ത് സെക്രട്ടറിയാണ് ഹെൽത്ത് ഇൻസ്പെക്ടറെ പരിശോധനയ്ക്ക് അയച്ചത്. കൊതുകുകൾ മാത്രമല്ല, പത്തി വിടർത്തുന്ന വിഷപ്പാമ്പുകളും ഉണ്ടെന്നു തുടക്കത്തിൽ തന്നെ ബോധ്യപ്പെട്ടു. പഞ്ചായത്ത് എന്തു നടപടി സ്വീകരിക്കുമെന്നു കാത്തിരിക്കുകയാണു നാട്ടുകാർ. കഴിഞ്ഞ മഴക്കാലത്തും ഇതേ പരാതി ഉയർന്നിരുന്നു.