കൊച്ചി മെട്രോ രണ്ടാം ഘട്ട നിർമാണം: ഗതാഗത നിയന്ത്രണം

കൊച്ചി∙ കൊച്ചി മെട്രോയുടെ രണ്ടാം ഘട്ട നിർമാണ പ്രവർത്തനങ്ങൾ സിവിൽ ലൈൻ റോഡിൽ പാലാരിവട്ടം മുതൽ കാക്കനാട് വരെ ആരംഭിച്ചതിന്റെ ഭാഗമായി ഗതാഗത നിയന്ത്രണം ഏർപ്പെടുത്തി. ഗതാഗതക്കുരുക്ക് ഒഴിവാക്കുന്നതിലേക്കായി വാഹന യാത്രികർക്ക് ഉപയോഗിക്കാവുന്ന മറ്റു മാർഗങ്ങൾ:

∙ എറണാകുളം ഭാഗത്തുനിന്ന് എൻജിഒ ക്വാർട്ടേഴ്സ്, കാക്കനാട്, ഭാരത് മാത കോളജ്, സീപോർട്ട്-എയർപോർട്ട് ഭാഗത്തേക്ക് പോകേണ്ട വാഹനങ്ങൾ മാമംഗലം, അഞ്ചുമന, പൈപ്പ് ലൈൻ റോഡ്, തോപ്പിൽ ജംക്‌ഷൻ, മേരിമാതാ റോഡ്, ഇല്ലത്തുമുഗൾ-മരോട്ടിചോട് റോഡ്, എൻജിഒ ക്വാർട്ടേഴ്സ് ജംക്‌ഷൻ, ഒലിമുഗൾ ജംക്‌ഷൻ വഴി സീപോർട്ട്-എയർപോർട്ട് റോഡിലേക്ക് യാത്ര ചെയ്യാം. ഇടപ്പള്ളി ബൈപ്പാസ് ജംക്‌ഷനിൽ നിന്നും മരോട്ടിചോട് റോഡിലൂടെ തോപ്പിൽ ജംക്‌ഷനിൽ എത്തി മേരിമാതാ റോഡ്, ഇല്ലത്തുമുഗൾ-മരോട്ടിചോട് റോഡ്, എൻജിഒ ക്വാർട്ടേഴ്സ് ജംക്‌ഷൻ, ഭാരത് മാത കോളജ് വഴി സീപോർട്ട്-എയർപോർട്ട് റോഡിൽ എത്തിയും യാത്ര ചെയ്യാം. മേൽ റൂട്ടിലൂടെ കാക്കനാട് ഭാഗത്തുനിന്നും എറണാകുളം ഭാഗത്തേക്ക് തിരിച്ചും യാത്ര ചെയ്യാവുന്നതാണ്.

∙ വൈറ്റില, കലൂർ, കതൃക്കടവ് എന്നീ ഭാഗങ്ങളിൽ നിന്ന് എൻജിഒ ക്വാർട്ടേഴ്സ്, കാക്കനാട്, ഭാരത് മാത കോളജ്, സീപോർട്ട് - എയർപോർട്ട് ഭാഗത്തേക്ക് പോകേണ്ട വാഹനങ്ങൾ തമ്മനം, പുതിയറോഡ്, തൈക്കാവ്, വെണ്ണല വഴിയും, കൂടാതെ ചക്കരപ്പറമ്പ്, വെണ്ണല വഴിയും, ശ്രീകല റോഡ്, ലെനിൻ സെന്റർ വഴി വീ ഗാർഡ് ജം‌ക്‌ഷൻ എത്തി പാലച്ചുവട് വഴി ഈച്ചമുക്കിലേക്കും, ഈച്ചമുക്ക് വഴി സീപോർട്ട്-എയർപോർട്ട് റോഡിലേക്കും, തുതിയൂർ വഴി ഇൻഫോപാർക്ക് വെസ്റ്റ് ഗേറ്റ് വഴിയും യാത്ര ചെയ്യാവുന്നതാണ്.