ചെമ്മണ്ണാർ ഗ്യാപ് റോഡിൽ കാർ മറിഞ്ഞ് ഒരാൾക്ക് പരുക്ക്

രാജാക്കാട് ∙ ചെമ്മണ്ണാർ ഗ്യാപ് റോഡിൽ രാജാക്കാട് മമ്മട്ടിക്കാനത്തിന് സമീപം കാർ നിയന്ത്രണം വിട്ട് റോഡിന് താഴേക്ക് മറിഞ്ഞു. അപകടത്തിൽ ഒരാൾക്ക് സാരമായി പരുക്കേറ്റു. രാജാക്കാട് സ്വദേശി ടി.ഡി. കുര്യനാണ് പരുക്കേറ്റത്. തിങ്കളാഴ്ച വൈകുന്നേരം അഞ്ചരയോടെയാണ് അപകടമുണ്ടായത്. കുത്തുങ്കൽ ഭാഗത്തുനിന്ന് കയറ്റം കയറി വരുകയായിരുന്ന കാർ മംഗാരം വളവിന് സമീപം നിയന്ത്രണം നഷ്ടപ്പെട്ട് മറിയുകയായിരുന്നു.

റോഡിൽ നിന്നു താഴേക്ക് തലകീഴായി മറിഞ്ഞ കാർ സമീപത്തെ മാവിൽ തട്ടി നിന്നതിനാൽ വലിയ അപകടം ഒഴിവായി. വാഹനത്തിൽ മൂന്നു പേരാണ് സഞ്ചരിച്ചിരുന്നത്. സാരമായി പരുക്കേറ്റ കുര്യനെ രാജാക്കാട്ടെ സ്വകാര്യ ആശുപത്രിയിൽ പ്രവേശിപ്പിച്ചു.