മറയൂരിൽ മൂർഖനെയും പെരുമ്പാമ്പിനെയും പിടികൂടി

മറയൂർ∙ മറയൂരിൽ കൃഷിത്തോട്ടങ്ങളിൽനിന്നു മൂർഖനെയും പെരുമ്പാമ്പിനെയും പിടികൂടി. പുളിക്കര വയലിൽ പാറായി കുട്ടിയച്ചന്റെ കാപ്പിത്തോട്ടത്തിൽനിന്നാണ് 11 അടി നീളമുള്ള പെരുമ്പാമ്പിനെ പിടികൂടിയത്. പെരുമ്പാമ്പ് എന്തോ ജീവിയെ വിഴുങ്ങിയ നിലയിൽ ചുരുണ്ടുകിടക്കുന്നതു കണ്ട തൊഴിലാളികൾ നാച്ചിവയൽ ഫോറസ്റ്റ് സ്റ്റേഷന് വിവരം അറിയിച്ചു. ഉടൻതന്നെ വനംവകുപ്പ് ഉദ്യോഗസ്ഥരും പാമ്പ് പിടിത്തത്തിൽ വിദഗ്ധനായ വാച്ചർ സെൽവരാജും സ്ഥലത്തെത്തി പിടികൂടുകയായിരുന്നു. പള്ളനാട് മംഗളംപാറയിൽ ശരവണന്റെ വീടിനു സമീപമുള്ള കമുക് തോട്ടത്തിൽനിന്നാണ് 6 അടി നീളമുള്ള മൂർഖനെ പിടികൂടിയത്. രണ്ടു പാമ്പുകളെയും വനം വകുപ്പിന്റെ നേതൃത്വത്തിൽ ചിന്നാർ വന്യജീവി സങ്കേതത്തിൽ ആലംപെട്ടിക്കു സമീപം തുറന്നുവിട്ടു