പുണെ മാർക്കറ്റ് ചതിച്ചാശാനെ; കരയിച്ച് സവാള വില: ഒരാഴ്ചയ്ക്കുള്ളിൽ വർധന 100 ശതമാനത്തിലേറെ

അടിമാലി ∙ ഹൈറേഞ്ചിൽ ഒരാഴ്ചയ്ക്കുള്ളിൽ സവാള വില വർധന 100 ശതമാനത്തിലേറെ. കഴിഞ്ഞ തിങ്കളാഴ്ച കിലോഗ്രാമിന് 40 രൂപയായിരുന്ന സവാള വില. എന്നാൽ ഇന്നലത്തെ അടിമാലിയിലെ ചില്ലറ വിൽപന വില 85 മുതൽ 90 രൂപ വരെയാണ്. ഒരു ചാക്ക് സവാള (50 കിലോ) ആവശ്യമുള്ളവർക്ക് 20 കിലോ മാത്രമാണ് ലഭിക്കുന്നത്. മഹാരാഷ്ട്ര പുണെയിൽ നിന്നാണ് കേരളത്തിലേക്ക് പ്രധാനമായും സവാള എത്തുന്നത്.

അവിടെ ദീപാവലി ആഘോഷങ്ങളെ തുടർന്ന് 10 ദിവസം മാർക്കറ്റ് അവധി ആയതാണ് സവാള വില വർധനയ്ക്ക് കാരണമായി പറയുന്നത്. ഇതു മുതലാക്കി സംസ്ഥാനത്തു നിന്നുള്ള മൊത്തക്കച്ചവടക്കാരാണ് വില വർധിപ്പിച്ചിരിക്കുന്നതെന്നാണ് ചില്ലറ വ്യാപാരികൾ പറയുന്നത്. ദീപാവലി അവധിക്കു ശേഷം പുണെ മാർക്കറ്റ് സജീവമാകുന്നതോടെ ഉയർന്ന വില കുറയുമെന്നാണ് വിലയിരുത്തപ്പെടുന്നത്.