കാനനപാതയിലൂടെയുള്ള ശബരിമല യാത്ര: നിരോധനം പിൻവലിച്ചു

വണ്ടിപ്പെരിയാർ∙ കനത്ത മഴയെത്തുടർന്ന് ശബരിമലയിലേക്ക് ജില്ലയിലെ കാനനപാതയിലൂടെയുള്ള യാത്ര നിരോധിച്ച ഉത്തരവ് മഴ മാറിയതിനെത്തുടർന്ന് പിൻവലിച്ചു. ഇന്നലെ മുതൽ കുമളിയിൽ നിന്ന് മുക്കുഴി, സത്രം വഴി ശബരിമലയിലേക്കുള്ള കാനനപാതയിലൂടെ തീർഥാടകർക്കു യാത്ര അനുവദിച്ചു തുടങ്ങി. 

മുൻ വർഷങ്ങളെ അപേക്ഷിച്ച് ഇത്തവണ കാനനപാതയിലൂടെ എത്തുന്ന തീർഥാടകരുടെ എണ്ണത്തിൽ വലിയ വർധനയുണ്ട്. ഇതുവരെ സത്രം കാനനപാതയിലൂടെ 12,357 തീർഥാടകർ ശബരിമലയിലേക്ക് കടന്നുപോയിട്ടുണ്ട്. സത്രം വഴി തിരികെ മടങ്ങിയവരുടെ എണ്ണം 103 ആണ്. കഴിഞ്ഞ 30നു മാത്രം 1831 തീർഥാടകർ സത്രത്തിൽ എത്തി. കനത്ത മഴയെ തുടർന്നാണ് രണ്ടു ദിവസം കാനനപാതയിലൂടെയുള്ള യാത്ര ജില്ലാ ഭരണകൂടം താൽക്കാലികമായി നിരോധിച്ചത്.