‘എംഎൽഎ ജീവിതത്തിൽ’ നിന്ന് ഒരു മാറ്റവും വരുത്താതെ ഷംസീർ
Mail This Article
തലശ്ശേരി ∙ കോവിഡ് നിയന്ത്രണങ്ങളുള്ളതിനാൽ വോട്ടർമാരെ നേരിൽ കണ്ടു നന്ദി പറയാൻ പറ്റാത്ത സാഹചര്യത്തിൽ എ.എൻ.ഷംസീർ എംഎൽഎ സമൂഹ മാധ്യമങ്ങളിലൂടെ കഴിയാവുന്നിടത്തോളം ആളുകളോടു സംവദിച്ചു നന്ദി അറിയിച്ചു. ഉജ്വല വിജയം നേടിയതിനു പിന്നാലെ ഇന്നലെ രാവിലെ പാർട്ടി ഓഫിസിലെത്തി ഏരിയാ സെക്രട്ടറി എം.സി.പവിത്രനുമായി വിവിധ പഞ്ചായത്തുകളിലെ വോട്ടിങ് നിലയെക്കുറിച്ചും തിരഞ്ഞെടുപ്പുമായി ബന്ധപ്പെട്ട കാര്യങ്ങളെക്കുറിച്ചും ചർച്ച ചെയ്തു. തുടർന്ന് എംഎൽഎ ഓഫിസിലെത്തി വിവിധ ഭാഗങ്ങളിൽ നിന്നെത്തിയ പാർട്ടി പ്രവർത്തകരെ കണ്ടു.
ഇതിനിടയിൽ വ്യാപാരി വ്യവസായി ഏകോപന സമിതിയുടെയും വ്യാപാരി വ്യവസായി സമിതിയുടെയും നേതൃത്വത്തിൽ തലശ്ശേരിയിലെ വ്യാപാരികൾ എത്തി ഷംസീറിനു പൂച്ചെണ്ടു നൽകി.കോവിഡ് ബാധിച്ച് 4 പേർ മരിക്കാനിടയായ ന്യൂമാഹിയിലെ വീട് ഉൾപ്പെടെ ഏതാനും മരണ വീടുകളിലും സെക്രട്ടറി എസ്.കെ.അർജുനൊപ്പം നിയുക്ത എംഎൽഎ സന്ദർശിച്ചു. ഇതിനു ശേഷം വീണ്ടും ഓഫിസിലെത്തി വിവിധ ഭാഗങ്ങളിൽ നിന്നു വരുന്ന ആശംസകൾക്കു മറുപടി നൽകി.
