എന്തു മനഃസുഖം കിട്ടുന്നു, ഇങ്ങനെയൊക്കെ ചെയ്യുമ്പോൾ?

കൊല്ലം ∙ ആളുകൾ കുളിക്കാനും വസ്ത്രം അലക്കാനും ഉപയോഗിക്കുന്ന കല്ലുപാലത്തിനും ഇരുമ്പ് പാലത്തിനും ഇടയിലുള്ള കച്ചേരി വാർഡിലെ ഊറ്റ്കുഴി കിണറ്റിൽ സാമൂഹിക വിരുദ്ധർ പ്ലാസ്റ്റിക് മാലിന്യം തള്ളി. ഇതോടെ മലിനമായ ജലം നാട്ടുകാർ ചേർന്നു വറ്റിച്ച ശേഷം ശുചീകരിച്ചു. വർഷങ്ങളായി ജനങ്ങൾ കുളിക്കാനും നനയ്ക്കാനും ഉപയോഗിക്കുന്ന പൊതുകിണറാണു തിങ്കളാഴ്ച രാത്രിയിൽ ചില സാമൂഹിക വിരുദ്ധർ മലിനമാക്കിയത്. കിണറിനു സമീപത്ത് ഹരിതകർമ സേനാംഗങ്ങൾ വാർഡിൽ നിന്നു ശേഖരിച്ച അനേകം പ്ലാസ്റ്റിക് മാലിന്യം ചാക്കിൽ കെട്ടി സൂക്ഷിച്ചിട്ടുണ്ട്. ഈ ചാക്കുകളാണ് കിണറിൽ തള്ളിയത്. ആശുപത്രി മാലിന്യവും ഇതിൽ ഉണ്ട്.