ഹോട്ടലിൽ തർക്കം:സിഐക്കെതിരെ കേസെടുത്തു

ഏറ്റുമാനൂർ ∙ ഭക്ഷണം വൈകിയതിനെച്ചൊല്ലി ഹോട്ടലിൽ സംഘർഷമുണ്ടാക്കിയെന്ന കേ‍സിൽ കോട്ടയം ക്രൈംബ്രാഞ്ച് സിഐക്കെതിരെ പൊലീസ് കേസെടുത്തു.  8നു രാത്രി ഏറ്റുമാനൂരിലെ ഹോട്ടലിലാണു സംഭവം. സിഐ ജി.ഗോപകുമാറിനെതിരെയാണു കേസ്.ഹോട്ടലിലെത്തി ഭക്ഷണം ഓർഡർ ചെയ്ത സിഐയോട് തിരക്കായതിനാൽ താമസമുണ്ടെന്നു ജീവനക്കാർ പറഞ്ഞു. ഇതിൽ ക്ഷുഭിതനായ സിഐ ഹോട്ടലിന്റെ ലൈസൻസും ഹെൽത്ത് കാർഡും ആവശ്യപ്പെട്ട് അടുക്കളയുടെയും ജീവനക്കാരുടെയും ഭക്ഷണം കഴിക്കാൻ എത്തിയവരുടെയും ദൃശ്യങ്ങൾ മൊബൈൽ ഫോണിൽ പകർത്തിയെന്നു പൊലീസ് പറഞ്ഞു. 

ഭക്ഷണം കഴിച്ചു കൊണ്ടിരുന്ന ഭാര്യയും ഭർത്താവും കുഞ്ഞും ഉൾപ്പെടുന്ന കുടുംബം തങ്ങളുടെ വിഡിയോ എടുത്തതു ചോദ്യം ചെയ്തതോടെ സംഘർഷമുണ്ടായെന്നാണു പരാതി. യുവതിയുടെ ഭർത്താവിനെതിരെ സിഐയും പരാതി നൽകിയിട്ടുണ്ട്.