ഉമ്മൻ ചാണ്ടിയുടെ അന്ത്യയാത്ര കെഎസ്ആർടിസി ബസിന്റെ മാതൃക നിർമിച്ച് യുവാക്കൾ

പാമ്പാടി ∙ മുൻ മുഖ്യമന്ത്രി ഉമ്മൻ ചാണ്ടിയുടെ അന്ത്യയാത്ര നടന്ന കെഎസ്ആർടിസി ലോ ഫ്ലോർ ബസിന്റെ മാതൃക നിർമിച്ച് യുവാക്കളുടെ കൂട്ടായ്മ. ഇതു പുതുപ്പള്ളി പള്ളിയിലെ ഉമ്മൻ ചാണ്ടിയുടെ  കല്ലറയിൽ സമർപ്പിക്കാനാണ് തീരുമാനം. തെങ്ങണ ബ്ലൂ ബേഡ് ഗ്രാഫിക്സിലെ  ജീവനക്കാരായ ജോണിക്കുട്ടി വർഗീസ്, സുബിൻ വർഗീസ്, വിഷ്ണു വിനോജ്, പവൻ മാത്യു, കിച്ചു വിഷ്ണു എന്നിവരടങ്ങിയ സംഘമാണ് ഏഴു ദിവസംകൊണ്ട് ബസിന്റെ മാതൃക നിർമിച്ചത്. ഫോറെക്സ് ഷീറ്റ്, തുണി, സ്റ്റിക്കർ എന്നിവ ഉപയോഗിച്ചു. നാലടി നീളത്തിലും അതിനൊത്ത ഉയരവും വീതിയുമുണ്ട്.