മൂന്നാംക്ലാസിലെ പുസ്തകം; ശ്രീലക്ഷ്മിയുടെ നല്ല ഒന്നാംക്ലാസ് വര!

കോട്ടയം ∙ പുതിയ അധ്യയനവർഷം മൂന്നാംക്ലാസിലെ കുഞ്ഞനുജൻമാരും അനുജത്തിമാരും പുതുപുത്തൻ പുസ്തകം തുറക്കുമ്പോൾ അവരെക്കാൾ സന്തോഷം ശ്രീലക്ഷ്മി  ജയറാമിനായിരിക്കും. ശ്രീലക്ഷ്മി വരച്ച 3 ചിത്രങ്ങൾ‍ മൂന്നാം ക്ലാസിലെ പരിസരപഠനം പുസ്തകത്തിലുണ്ട്. പാലാ ഭരണങ്ങാനം എസ്എച്ച് ഗേൾസ് ഹൈസ്കൂളിലെ പത്താം ക്ലാസ് വിദ്യാർഥിനിയാണു ശ്രീലക്ഷ്മി. സംസ്ഥാന കലോത്സവത്തിൽ ചിത്രരചനയിൽ എ ഗ്രേഡ് നേടിയ 6 വിദ്യാർഥികൾ വരച്ച ചിത്രങ്ങളാണ് എസ്‌സിഇആർടി പുസ്തകങ്ങളി‍ൽ ഉൾപ്പെടുത്തിയത്. ഇതിൽ ജില്ലയിൽനിന്നുള്ള ഏക വിദ്യാർഥിനിയാണ് ശ്രീലക്ഷ്മി. ഇവരിൽ 2 പേർ ഒഴികെ എല്ലാവരും പത്താം ക്ലാസ് പൂർത്തിയാക്കി. 

ശ്രീലക്ഷ്മിയും കൊല്ലം പട്ടത്താനം വിമലഹൃദയ ഗേൾസ് എച്ച്എസ്എസിലെ അനന്യ എസ്.സുഭാഷും പത്താം ക്ലാസിലാണ്. തിരുവനന്തപുരത്തു നടത്തിയ  ക്യാംപിലാണ് പുസ്തകചിത്രങ്ങൾ ഇവർ വരച്ചത്. ആലപ്പുഴ കൊറ്റൻകുളങ്ങര അവലൂക്കുന്ന് കോട്ടപ്പടിക്കൽ കെ.ജി.ജയന്റെയും (കൺസ്ട്രക്​ഷൻ കമ്പനി, പാലാ) ഇ.കെ.രാജശ്രീയുടെയും മകളാണ്. എട്ടാംക്ലാസ് മുതൽ ഭരണങ്ങാനം സ്കൂളിലാണ് പഠനം. എൻടിപിസി (നാഷനൽ തെർമൽ പവർ കോർപറേഷൻ) ദേശീയതലത്തിൽ നടത്തിയ ചിത്രരചനാമത്സരത്തിലും ശ്രീലക്ഷ്മിക്ക് സമ്മാനം ലഭിച്ചിരുന്നു. 3 വർഷമായി സംസ്ഥാന കലോത്സവത്തിൽ ചിത്രരചനയ്ക്ക് എ ഗ്രേഡുണ്ട്.