ശുദ്ധജലക്ഷാമം: ദുരിതം വർധിക്കുന്നു ഇല്ലിയാനിപ്പുഴ വരളുന്നു

ചക്കിട്ടപാറ∙ പൂഴിത്തോട്ടിലെ പ്രധാന ജലസ്രോതസ്സായ ഇല്ലിയാനിപ്പുഴ വേനൽ കടുത്തതോടെ വറ്റിവരളുന്നു. ശുദ്ധജലക്ഷാമം രൂക്ഷമാകുമെന്ന് ആശങ്ക. എസ്എൻഡിപി പ്രദേശത്ത് നിന്ന് ആരംഭിക്കുന്ന 2 കിലോമീറ്ററിലധികം ദൈർഘ്യമുള്ള  ഇല്ലിയാനിപ്പുഴ കടന്തറപ്പുഴയിലാണ് എത്തിച്ചേരുന്നത്.വെള്ളത്തിന്റെ ഒഴുക്ക് നിലച്ചിരിക്കുകയാണ്. വേനലിൽ ഒട്ടേറെ കുടുംബങ്ങൾ ആശ്രയിക്കുന്ന പുഴയാണിത്. സമീപത്തെ കിണറുകളിലും വെള്ളം കുറഞ്ഞിട്ടുണ്ട്.

പൂഴിത്തോട്, ചെമ്പനോട മേഖലയിലെ നൂറുകണക്കിനു കുടുംബങ്ങൾ കുടിവെള്ളത്തിന് ആശ്രയിക്കുന്ന ജലനിധി പദ്ധതിക്ക് ഈ പുഴയിൽ നിന്നാണ്  വെള്ളം ശേഖരിക്കുന്നത്. വേനൽ വരും ദിവസങ്ങളിൽ കൂടുതൽ കടുത്താൽ പുഴ പൂർണമായും വറ്റുമെന്ന് പ്രദേശവാസികൾ പറയുന്നു. പുഴയിൽ നീരൊഴുക്ക് വർധിപ്പിക്കാനും ജലവിതരണം കൃത്യമായി നടത്താനും അധികൃതർ അടിയന്തര നടപടിയെടുക്കണമെന്നു നാട്ടുകാർ ആവശ്യപ്പെട്ടു.