തീരദേശ റോഡിൽ തകർച്ച തുടരുന്നു; 800 മീറ്റർ റോഡ് കടലെടുത്തു

കാപ്പാട്∙ തൂവപ്പാറ മുതൽ പൊയിൽക്കാവ് ബീച്ച് വരെയുള്ള റോഡ് കടലേറ്റത്തിൽ തകർന്നു. 800 മീറ്ററോളം റോഡാണ് കടലെടുക്കുന്നത്. നേരത്തെ വലിയ കുഴി രൂപപ്പെട്ട സ്ഥലത്താണ് വീണ്ടും റോഡ് തകർന്നത്. മുൻപ് തകർന്ന റോഡ് പൂർവസ്ഥിതിയിലാക്കാൻ ഏറെക്കാലം വേണ്ടി വന്നിരുന്നു.

നേരത്തെ തകർന്ന റോഡിന് സംരക്ഷണ ഭിത്തി നിർമിക്കാത്തതാണ് റാേഡ് തകരാൻ ഇടയാക്കിയത്. കാപ്പാട് മുതൽ കൊയിലാണ്ടി ഹാർബർ വരെയുള്ള റോഡ് ദേശീയപാതയ്ക്ക് സമാന്തരമായുള്ള ബദൽ റോഡ് കൂടിയാണ്. 

കാപ്പാട് തൂവപ്പാറ മുതൽ പൊയിൽക്കാവ് ബീച്ച് വരെയുള്ള ഭാഗത്താണ് റോഡ് തകർച്ച. ആഞ്ഞടിക്കുന്ന തിരമാലകൾ കടൽഭിത്തി കടന്ന് റോഡ് തകർക്കുകയാണ്. പ്രധാനമന്ത്രി സഡക് യോജന പ്രകാരം നിർമിച്ച റോഡ് ജില്ലാ പഞ്ചായത്തിന് കൈമാറിയതാണ്.