കടലുണ്ടിക്കടവ് അഴിമുഖം മാലിന്യ കേന്ദ്രമായി

കടലുണ്ടി∙ ടൺ കണക്കിനു പാഴ്‌വസ്തുക്കൾ അടിഞ്ഞു കൂടി കടലുണ്ടിക്കടവ് അഴിമുഖം മാലിന്യ കേന്ദ്രമായി. കടലുണ്ടിപ്പുഴയിലും കടലിലും ഒഴുകിയെത്തിയ അജൈവ മാലിന്യമാണ് തീരത്തെങ്ങും. പാലത്തിനു താഴെ തീരത്താകെ വ്യാപിച്ചു. നദീ തീരത്തേക്ക് ഇറങ്ങാൻ പറ്റാത്ത നിലയാണ്.പഴയ പ്ലാസ്റ്റിക് കുപ്പികൾ, ചെരിപ്പു അവശിഷ്ടങ്ങൾ, തെർമോകോൾ കഷണങ്ങൾ തുടങ്ങിയവയാണ് ഏറെയും. പ്ലാസ്റ്റിക് മാലിന്യം വ്യാപിച്ചത് നദിക്കും പരിസ്ഥിതിക്കും ഭീഷണി ഉയർത്തുകയാണ്. കടലേറ്റത്തിലാണ് മാലിന്യം തീരത്ത് അടിഞ്ഞത്.വേലിയേറ്റ സമയത്തു പുഴയിലേക്ക് ഒഴുകുന്ന മാലിന്യം പക്ഷിസങ്കേതത്തിലേക്ക് വ്യാപിക്കുമെന്ന സ്ഥിതിയാണ്. ഇതു പക്ഷികളുടെ സ്വൈരവിഹാരത്തിന് തിരിച്ചടിയാകുമെന്ന ആശങ്കയും ഉയർന്നിട്ടുണ്ട്. പാലം പരിസരത്തെ മാലിന്യം നീക്കം ചെയ്യാൻ നടപടിയുണ്ടാവുന്നില്ല.