ചെമ്മാണിയോട്​ ഉപതിരഞ്ഞെടുപ്പ് കരുത്തുകാട്ടി യുഡിഎഫ്​ ; 1258 വോട്ടുകളുടെ വർധന

മേലാറ്റൂർ∙ പെരിന്തൽമണ്ണ​  ബ്ലോക്ക് പഞ്ചായത്തിലെ​ ചെമ്മാണിയോട്​ ഡിവിഷനിലേക്ക്​ നടന്ന ഉപതിരഞ്ഞെടുപ്പിൽ എൽഡിഎഫിന് അടി തെറ്റി. യുഡിഎഫിന്​ അപ്രതീക്ഷിത മുന്നേറ്റം. കണക്കുകൂട്ടലുകൾക്കുമപ്പുറമുള്ള വോട്ടുകളാണ്​ യുഡിഎഫിലെ മുസ്​ലിം ലീഗ്​ സ്​ഥാനാർഥി യു.ടി. മുൻഷിർ നേടിയത്​. കഴിഞ്ഞ പൊതുതിരഞ്ഞെടുപ്പിൽ യുഡിഎഫ്​ സ്ഥാനാർഥിക്ക്​ ലഭിച്ചതിനേക്കാൾ 1258 വോട്ടുകളാണ്​ കൂടുതൽ ലഭിച്ചത്​​. കഴിഞ്ഞതവണ ലഭിച്ച വോട്ടിൽനിന്ന്​ 831 വോട്ടുകൾ​ എൽഡിഎഫിന്​ കുറഞ്ഞു​. ബിജെപിക്കും 256 വോട്ടു കുറഞ്ഞു. ഡിവിഷനു കീഴിൽ 9 വാർഡുള്ളതിൽ 6 വാർഡുകളിലും 300ലേറെ വോട്ടിന്റെ ഭൂരിപക്ഷമാണ്​ യുഡിഎഫ്​ നേടിയത്​. 

കീഴാറ്റൂർ ഗ്രാമ പഞ്ചായത്തിലുൾപ്പെടുന്ന ആനപ്പാംകുഴി വാർഡിൽ ലഭിച്ച 540 വോട്ടാണ്​ ഏറ്റവും വലിയ ഭൂരിപക്ഷം. കുറവ്​ ചെമ്മാണിയോട്​ വാർഡിലാണ്​ 176.  കൊടക്കാടഞ്ചേരി വാർഡിൽ മാത്രമാണ്​ (15 വോട്ട്​) എൽഡിഎഫ്​ ലീഡ്​ നേടിയത്​. കഴിഞ്ഞ തവണത്തേക്കാൾ പോളിങ്​ കുറവാണ്​ ഇത്തവണ രേഖപ്പെടുത്തിയത്​ 61.13 ശതമാനം. 14386ൽ മൊത്തം 8758 വോട്ടാണ്​ പോൾ ചെയ്തത്.

എൽഡിഎഫ്​ ഭരിക്കുന്ന മേലാറ്റൂർ പഞ്ചായത്തിൽ 6 വാർഡുകളിലും യുഡിഎഫ്​ വൻ മുന്നേറ്റം നടത്തിയത്​ ഇടതുപക്ഷത്തിന്​ തിരിച്ചടിയായി. പഞ്ചായത്ത്​ തിരഞ്ഞെടുപ്പിൽ എൽഡിഎഫ്​ വിജയിച്ച കാട്ടുചിറ വാർഡിൽ 185 വോട്ടിന്റെ ലീഡാണ്​ യുഡിഎഫ്​ നേടിയത്​. കീഴാറ്റൂർ പഞ്ചായത്തിലെ രണ്ട്​ വാർഡുകളും മേലാറ്റൂർ പഞ്ചായത്തിലെ ഏഴ്​ വാർഡുകളും ഉൾപ്പെടുന്നതാണ്​ ചെമ്മാണിയോട്​ ഡിവിഷൻ. വൈകിട്ട് തുറന്ന വാഹനത്തിൽ വിജയിയെ ആനയിച്ചു കൊണ്ട് ഡിവിഷൻ ഉൾപ്പെടുന്ന ഭാഗങ്ങളിൽ ആഹ്ലാദമായി യുഡിഎഫ് പ്രവർത്തകർ ബൈക്ക് റാലി നടത്തി.