വെള്ളം കുടിപ്പിച്ച് കുഞ്ഞു യസീദും കുട്ടിപ്പടയും

മഞ്ചേരി ∙ നാലര വയസ്സുകാരൻ മുഹമ്മദ് യസീദ് ഇന്നലെ അതിരാവിലെ മുതൽ ബാപ്പ തച്ചങ്ങോടൻ അബ്ദുറഹിമാന്റെയൊപ്പം ചെങ്ങര പള്ളിപ്പടിയിലെ റോഡിലുണ്ട്. മാരത്തണിൽ ഓടിയെത്തിയ താരങ്ങൾക്കു വെള്ളം കൊടുക്കാൻ കുട്ടിപ്പടയുടെ മുന്നിൽ യസീദായിരുന്നു. വെള്ളം നിറച്ച ഗ്ലാസ് കയ്യിൽ ഉയർത്തിപ്പിടിച്ചു താരങ്ങളെ ആരവത്തോടെ പ്രോത്സാഹിപ്പിച്ച് മത്സരം തീരുന്നതുവരെ സജീവമായി.

മഞ്ചേരി ആൻഡേഴ്സ് പബ്ലിക് സ്കൂൾ എൽകെജി വിദ്യാർഥിയായ യസീദ് സ്കേറ്റിങ് പരിശീലിക്കുന്നുണ്ട്. ചെങ്ങരയിലെ നാട്ടുകാരും യുവാക്കളും ക്ലബ് പ്രവർത്തകരും മുഴുവൻ സമയവും പഴവും നാരങ്ങാവെള്ളവും വിതരണം ചെയ്തു മാരത്തണിനൊപ്പം നിന്നു.