എട്ടു വയസ്സുകാരനെ പീഡിപ്പിച്ച കേസിൽ 55 വർഷം തടവു ശിക്ഷ

നിലമ്പൂർ ∙ എട്ടു വയസ്സുകാരനെ പീഡിപ്പിച്ച കേസിൽ എടക്കര ഉണിചന്തം പുതുവൻചോല ജിൻഷാദിന് (27) 55 വർഷം കഠിനതടവും, 85,000 രൂപ പിഴയും ശിക്ഷ വിധിച്ചു. പിഴയടച്ചില്ലെങ്കിൽ 21 മാസം അധിക തടവ് അനുഭവിക്കണമെന്നും ശിക്ഷ ഒന്നിച്ച് അനുഭവിച്ചാൽ മതിയെന്നും ഫാസ്റ്റ്ട്രാക്ക് പ്രത്യേക കോടതി ജഡ്ജി കെ.പി.ജോയ് വിധിച്ചു. 2021 നവംബർ ഒന്നിനും അതിനു മുൻപു രണ്ടു തവണയും ചൂണ്ടയിടാനെന്ന വ്യാജേന കൂട്ടിക്കൊണ്ടുപോയി പീഡിപ്പിച്ചെന്നാണു പരാതി. എടക്കര ഇൻസ്പെക്ടർ പി.എസ്.മഞ്ജിത്ത് ലാൽ ആണ് അന്വേഷണം നടത്തി കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ സാം കെ.ഫ്രാൻസിസ് ഹാജരായി. 12 സാക്ഷികളെ വിസ്തരിച്ചു. 13 രേഖകൾ ഹാജരാക്കി. പ്രതിയെ തവനൂർ സെൻട്രൽ ജയിലിലേക്ക് അയച്ചു.