നാടുകാണി വഴി തമിഴ്നാട്ടിലേക്കു പോകുന്ന സഞ്ചാരികൾ ജാഗ്രതൈ; പ്ലാസ്റ്റിക് കൈവശമുണ്ടെങ്കിൽ പണികിട്ടും

നിയന്ത്രണമല്ല; ഈ കരുതൽ നാടിനു വേണ്ടി 

"വൈൽഡ് ലൈഫ് ഫൊട്ടോഗ്രഫറായ സാദിഖലിയും കുറച്ചാളുകളും ഒരു മാസം മുൻപ് എന്റെയടുത്ത് വന്നിരുന്നു. നാടുകാണി ചുരത്തിൽ പ്ലാസ്റ്റിക് പ്ലേറ്റുകളും മറ്റും വലിച്ചെറിയുന്നതു കാരണമുണ്ടാകുന്ന പ്രശ്നങ്ങൾ അവർ ശ്രദ്ധയിൽപെടുത്തി. കാടും ജലസ്രോതസ്സുകളും മലിനമാകുന്നതിനൊപ്പം പ്ലാസ്റ്റിക് വസ്തുക്കൾ ഭക്ഷിക്കുന്നതു കാരണം വന്യമൃഗങ്ങളുടെ ജീവനുവരെ ഭീഷണിയുണ്ടാകാനുള്ള സാധ്യതയുണ്ട്. പ്രശ്നം പരിഹരിക്കാനായി വിളിച്ചുചേർത്ത യോഗത്തിലാണ് വഴിക്കടവ് പഞ്ചായത്ത് പ്ലാസ്റ്റിക് ചെക്പോസ്റ്റ് നടപ്പാക്കാനുള്ള സന്നദ്ധത അറിയിച്ചത്. 

പൊതുജനങ്ങളെ ബുദ്ധിമുട്ടിക്കാതെ ഇതു നടപ്പാക്കാനാണ് ഉദ്ദേശിക്കുന്നത്. ആദ്യഘട്ടത്തിൽ ബോധവൽക്കരണം മാത്രമായിരിക്കും. പിന്നീട് പിഴ ഈടാക്കുന്നതുൾപ്പെടെയുള്ള നടപടികളുണ്ടാകും. പ്ലാസ്റ്റിക് പ്ലേറ്റുകൾക്കു പകരം വാടകയ്ക്കോ വിലയ്ക്കോ സ്റ്റീൽ പാത്രങ്ങളും മറ്റും നൽകുന്നതുൾപ്പെടെ ഭാവിയിൽ ആലോചിക്കുന്നു. ചിപ്സോ ബിസ്കറ്റോ കൊണ്ടുവരുന്നവർക്ക് അതിന്റെ കവർ മാറ്റി പകരം കുപ്പിയിലിട്ടു നൽകുന്നതുൾപ്പെടെ പരിഗണിക്കേണ്ടി വരും. തമിഴ്നാട്ടിൽ പിഴ ഈടാക്കി അവർ നല്ല രീതിയിൽ നിയന്ത്രണം നടപ്പാക്കുന്നുണ്ട്. ജനങ്ങൾ കൂടുതൽ ബോധവാന്മാരാകുന്നതോടെ നമുക്കും ലക്ഷ്യം കൈവരിക്കാനാകും. ജനങ്ങളുടെ സഹകരണമാണു പ്രധാനം".

വിപത്തിനെ തിരിച്ചറിഞ്ഞു,  മുൻപേ പുറത്താക്കി

"നാടുകാണി ചുരത്തിൽ പ്ലാസ്റ്റിക് മാലിന്യങ്ങൾ ഒഴിവാക്കുന്നതിനായി ജില്ലാ ഭരണകൂടത്തിന്റെ നിർദേശപ്രകാരം വഴിക്കടവ് പഞ്ചായത്ത് പുതിയ പദ്ധതി നടപ്പാക്കുന്നതിൽ വലിയ സന്തോഷമുണ്ട്. പ്ലാസ്റ്റിക് എന്ന അപകടകാരിയെ തിരിച്ചറിഞ്ഞ് പരമാവധി അതിന്റെ ഉപയോഗം കുറയ്ക്കുന്നതിന് മഅദിൻ അക്കാദമി നടത്തിയ ശ്രമങ്ങൾ ഞങ്ങൾക്കു നൽകുന്നത് വലിയ അഭിമാനമാണ്. റമസാൻ മാസത്തിൽ ഓരോ ദിവസവും 1500 പേരാണ് മഅദിനിൽ നോമ്പ് തുറക്കാനെത്തുന്നത്. അവർക്കെല്ലാം ഭക്ഷണം നൽകാൻ സ്റ്റീൽ പ്ലേറ്റും ഗ്ലാസുമാണ് ഉപയോഗിക്കുന്നത്. റമസാനിന്റെ ഭാഗമായി പാവപ്പെട്ടവർക്കു വിതരണം ചെയ്യുന്ന കിറ്റിന് ഉപയോഗിക്കുന്നത് തുണിസഞ്ചിയാണ്. മഅദിൻ കുടുംബാംഗങ്ങളിൽ മാലിന്യനിർമാർജനത്തിന്റെ പ്രാധാന്യം ബോധ്യപ്പെടുത്താൻ പ്രത്യേക ക്യാംപെയ്ൻ തുടങ്ങാൻ ഞങ്ങൾ തീരുമാനിച്ചിട്ടുണ്ട്  ".