ഭക്ഷണം നൽകാനും സെൽഫി എടുക്കാനും സഞ്ചാരികൾ വാഹനം നിർത്തും; ദേ റോഡ് ഇപ്പോൾ ഇങ്ങനെ...
![palakkad-monkey palakkad-monkey](https://img-mm.manoramaonline.com/content/dam/mm/mo/district-news/palakkad/images/2022/10/24/palakkad-monkey.jpg?w=1120&h=583)
Mail This Article
വാൽപാറ ∙ നഗരത്തിലും തോട്ടം മേഖലകളിലെ തൊഴിലാളികളുടെ പാർപ്പിടങ്ങളിലും അടക്കം നുഴഞ്ഞുകയറി സിംഹവാലൻ കുരങ്ങുകൾ. ദിവസവും ഇവയുടെ ശല്യം വർധിച്ചുവരുന്നതായി നാട്ടുകാർ പറയുന്നു. നഗരത്തോടു ചേർന്നുള്ള പുതുതോട്ടം എസ്റ്റേറ്റിലെ ചോലകൾ ഇവയുടെ പ്രധാന താവളമാണ്. വാഹനങ്ങൾ സഞ്ചരിക്കുന്ന റോഡിൽ ഇവ നിലയുറപ്പിക്കുന്നത് അപകടത്തിനിടയാക്കുന്നുണ്ട്. കൂടാതെ ഇവയുടെ ജീവനും ഭീഷണിയാണ്.
ഇതുവഴി കടന്നുപോകുന്ന വിനോദ സഞ്ചാരികൾ എന്തെങ്കിലും ഭക്ഷണങ്ങൾ നൽകുമെന്ന പ്രതീക്ഷയിലാണ് ഇവ റോഡിലേക്കിറങ്ങുന്നതെന്നു വനംവകുപ്പ് അധികൃതർ പറയുന്നു. ഇവയ്ക്ക് ഭക്ഷണ സാധനങ്ങൾ നൽകരുതെന്നും വനംവകുപ്പ് മുന്നറിയിപ്പു നൽകുന്നുണ്ട്. ഭക്ഷണം നൽകാനും സെൽഫിയെടുക്കാനും വിനോദസഞ്ചാരികൾ വാഹനം നിർത്തുന്നതും അപകടങ്ങൾക്കു കാരണമാകുന്നുണ്ട്.
ചില സമയങ്ങളിൽ ഭക്ഷണം കിട്ടാതെ വരുമ്പോൾ ഇവ കൂട്ടത്തോടെ നഗരത്തിലേക്ക് എത്തി വീടുകളിൽനിന്ന് അടക്കം ഭക്ഷ്യവസ്തുക്കൾ കൊണ്ടുപോകുന്നതായും പറയുന്നു. പാത്രങ്ങളും വസ്ത്രങ്ങളും അടക്കം നശിപ്പിച്ചാണ് പലപ്പോഴും ഇവ മടങ്ങുക. ഉടൻ നടപടി വേണമെന്നാണ് നാട്ടുകാരുടെ ആവശ്യം.