വാൽപാറ- പൊള്ളാച്ചി ഹെയർപിൻ വളവുകൾക്ക് മൃഗങ്ങളുടെയും പക്ഷികളുടെയും പേര്

വാൽപാറ ∙ പൊള്ളാച്ചിയിലേക്കുള്ള പാതയിലെ ഹെയർപിൻ വളവുകൾ ഓരോന്നും ഇനി വന്യമൃഗങ്ങളുടെയും വിവിധ പക്ഷികളുടെയും പേരുകളിൽ അറിയപ്പെടും. ഓരോ വളവിലും സംസ്ഥാന ഹൈവേ വകുപ്പിന്റെ നേതൃത്വത്തിൽ പ്രത്യേക ബോർഡുകൾ സ്ഥാപിച്ചു. ഒന്നാം വളവു മുതൽ നാൽപതാം വളവു വരെയാണ് ഇത്തരം ബോർഡുകൾ. ഓരോ ബോർഡിലും മൃഗങ്ങളുടെയോ പക്ഷികളുടെയോ മനോഹരമായ ചിത്രം വരച്ചു പേരും നൽകിയിരിക്കുകയാണ്. സംസ്ഥാനത്ത് ഇതാദ്യമായാണ് ഹൈവേ വകുപ്പിന്റെ നേതൃത്വത്തിൽ ഇത്തരമൊരു നടപടി.