കായിക സ്വപ്നങ്ങൾക്ക് കരുത്ത് വാഗ്ദാനം ചെയ്ത് ഡോ. പി. സരിൻ

പാലക്കാട് ∙ പാലക്കാട് ഗവ.മെഡിക്കൽ കോളജ് മൈതാനത്തു കായിക താരങ്ങൾക്കും വിദ്യാർഥികൾക്കുമൊപ്പം പ്രഭാത സവാരിയോടെയാണ് എൽഡിഎഫ് സ്വതന്ത്ര സ്ഥാനാർഥി ഡോ.പി.സരിന്റെ പ്രചാരണം ആരംഭിച്ചത്. അവരോടൊപ്പം പരിശീലനത്തിലും പങ്കുചേർന്നു. കായിക സ്വപ്നങ്ങൾക്കു കരുത്തു പകരുന്ന ഒട്ടേറെ പദ്ധതികൾ സരിൻ വാഗ്ദാനം ചെയ്തു.

ഒലവക്കോട്, മണൽമന്ത, തോണിപ്പാളയം, പുതുപ്പരിയാരം, മാട്ടുമന്ത, ഗവ.വിക്ടോറിയ കോളജ് റോഡ്, സുൽത്താൻപേട്ട എന്നിവിടങ്ങളിൽ പ്രചാരണം നടത്തി. പാലക്കാട് എൻഎസ്എസ് താലൂക്ക് ഓഫിസിൽ മന്നത്ത് പത്മനാഭന്റെ ശിൽപത്തിൽ പുഷ്പാർച്ചന നടത്തി. മഹാരാഷ്ട്ര മുൻ ഗവർണറും മുതിർന്ന കോൺഗ്രസ് നേതാവുമായിരുന്ന അന്തരിച്ച കെ.ശങ്കരനാരായണന്റെ ശേഖരീപുരത്തെ വസതിയിലെത്തി കുടുംബാംഗങ്ങളെ സന്ദർശിച്ചു.