റോഡിൽ കത്തിനിന്ന സൗരോർജ വിളക്ക് പിഴുതു തള്ളി; ഇപ്പോൾ അനാഥമായി വഴിവക്കത്ത് കിടക്കുന്നു

റാന്നി ∙ റോഡിൽ കത്തിനിന്ന വഴിവിളക്ക് പിഴുതു തള്ളി. നാഥനില്ലാതെ വിളക്കിപ്പോൾ പൊതു സ്ഥലത്തു കിടക്കുന്നു. അടിച്ചിപ്പുഴ കമ്യൂണിറ്റി ഹാളിനു സമീപത്തെ കാഴ്ചയാണിത്. 6 വർഷം മുൻപ് റാന്നി ബ്ലോക്ക് പഞ്ചായത്തിൽ നിന്ന് സ്ഥാപിച്ച സൗരോർജ വിളക്കാണിത്. ബലക്ഷയത്തെ തുടർന്നു പൊളിച്ചു നീക്കിയ കമ്യൂണിറ്റി ഹാളിനു സമീപം റോഡിൽ സ്ഥാപിച്ചിരിക്കുകയായിരുന്നു വിളക്ക്. 

 സൗരോർജ പാനലിനു പുറമേ 4 ലൈറ്റുകളും ബാറ്ററിയുമാണ് വിളക്കു കാലിലുള്ളത്. കാർ ഇടിച്ച് കാൽ ചെറുതായി വളഞ്ഞിരുന്നു. പിന്നാലെ മണ്ണുമാന്തി ഉപയോഗിച്ച് വഴിവിളക്ക് പിഴുതു നീക്കുകയായിരുന്നു. സുരക്ഷിതമായ സ്ഥലത്ത് ഇത് സ്ഥാപിക്കാൻ നടപടിയുണ്ടായിട്ടില്ല. വിളക്ക് പിഴുതു നീക്കിയവർക്കെതിരെ പരാതി നൽകിയിട്ടും നടപടിയില്ലെന്നാണ് ആക്ഷേപം.