പീഡനക്കേസ് പ്രതി സമ്മേളന പ്രതിനിധി: ലോക്കൽ കമ്മിറ്റി യോഗത്തിൽ വാക്കേറ്റം

തിരുവല്ല ∙ പീഡനക്കേസിൽ പ്രതി ചേർക്കപ്പെട്ട് സിപിഎം ലോക്കൽ കമ്മിറ്റിയിൽനിന്നു പുറത്താക്കപ്പെട്ടയാളെ സമ്മേളന പ്രതിനിധിയായി തിരഞ്ഞെടുക്കപ്പെട്ടതിനെ ചൊല്ലി ചേരിതിരിവ്. വാക്കേറ്റത്തെ തുടർന്ന് ലോക്കൽ കമ്മിറ്റി യോഗം അലങ്കോലപ്പെട്ടു. ഇന്നലെ വൈകിട്ട് ചേർന്ന തിരുവല്ല ടൗൺ നോർത്ത് ലോക്കൽ കമ്മിറ്റിയാണ് അലങ്കോലപ്പെട്ടത്. 

പീഡനക്കേസിൽ അടക്കം ഉൾപ്പെട്ട് ലോക്കൽ കമ്മിറ്റിയിൽ നിന്നു ഒഴിവാക്കിയ സി.സി.സജിമോനെ സമ്മേളന പ്രതിനിധിയായി തിരഞ്ഞെടുത്തതിനെ ചൊല്ലി യോഗത്തിൽ തർക്കമുണ്ടാകുകയായിരുന്നു. ജില്ലാ നേതാക്കൾ അടക്കമുള്ളവർ പങ്കെടുത്ത യോഗത്തിൽ ആയിരുന്നു ഇത്. വാക്കേറ്റം കയ്യാങ്കളിയുടെ വക്കിൽ എത്തിയതോടെ യോഗം പിരിച്ചുവിട്ടു.  ബുധനാഴ്ച നടന്ന കോട്ടാലി ബ്രാഞ്ച് സമ്മേളനത്തിലാണ് സജിമോനെ ലോക്കൽ സമ്മേളന പ്രതിനിധിയായി തിരഞ്ഞെടുത്തത്.