പണമടങ്ങിയ ബാഗ് തിരികെ ലഭിച്ച സന്തോഷത്തിൽ സുരേഷ്

പന്തളം ∙ നഷ്ടപ്പെട്ടെന്ന് കരുതിയ പണമടങ്ങിയ ബാഗ് തിരികെക്കിട്ടിയതിന്റെ ആശ്വാസത്തിലാണ് കാരയ്ക്കാട് തട്ടക്കാട്ട് വടക്കേതിൽ സുരേഷ്. ബാഗ് കണ്ടെത്തി നൽകിയതിന് പന്തളം പൊലീസിന് നന്ദി പറയുകയാണ് അദ്ദേഹം. സ്റ്റേഷനിലെത്തിയ സുരേഷിന് പൊലീസ് ബാഗ് കൈമാറി. കഴിഞ്ഞ ദിവസം ഒരു യാത്ര കഴിഞ്ഞു മടങ്ങി വരുന്നവഴിയാണ് സുരേഷിന്റെ ബാഗ് നഷ്ടമായത്. ബസ് സ്റ്റാൻഡിലും മറ്റും അന്വേഷിച്ചെങ്കിലും ഫലമുണ്ടായില്ല. 

സങ്കടത്തിലായ സുരേഷ് പിന്നീട് പൊലീസ് സ്റ്റേഷനിലെത്തി പരാതി നൽകുകയായിരുന്നു. തുടർന്ന് എസ്ഐ അനീഷ് ഏബ്രഹാമിന്റെ നേതൃത്വത്തിലുള്ള സംഘം ബസ് സ്റ്റാൻഡിലും പരിസരത്തും നടത്തിയ തിരച്ചിലിൽ ബാഗ് കണ്ടെത്തി. പൊലീസ് ഉദ്യോഗസ്ഥരായ സോളമൻ ഡേവിഡ്, ശരത് പിള്ള, എസ്.അൻവർഷ, അനൂജ് എന്നിവരും അന്വേഷണത്തിൽ പങ്കെടുത്തു.