സംസ്ഥാന ബജറ്റ്: നെയ്യാറ്റിൻകര മണ്ഡലത്തിന് പദ്ധതികളേറെ
Mail This Article
നെയ്യാറ്റിൻകര ∙ ജനറൽ ആശുപത്രിയിൽ മന്ദിരം നിർമിക്കാൻ 6 കോടി രൂപ, 2018 പ്രളയത്തിൽ തകർന്ന അമരവിള പുല്ലാമല ബണ്ട് പുനഃസ്ഥാപിക്കാൻ 3 കോടി ഉൾപ്പെടെ, നെയ്യാറ്റിൻകര മണ്ഡലത്തിൽ ഒട്ടേറെ പദ്ധതികൾക്ക് തുക അനുവദിച്ചതായി കെ.ആൻസലൻ എംഎൽഎ അറിയിച്ചു.
ആശുപത്രി ഐപി കെട്ടിടത്തിനായി പ്രഖ്യാപിച്ച 6 കോടി രൂപയിൽ 1.20 കോടി രൂപ ടോക്കൺ പ്രൊവിഷൻ ആയി ഉൾപ്പെടുത്തിയിട്ടുണ്ട്. പുല്ലാമല ബണ്ടിന്റെ പുനഃസ്ഥാപനത്തിനു വേണ്ടി ടോക്കൺ പ്രൊവിഷൻ ആയി 60 ലക്ഷം രൂപ ഉൾപ്പെടുത്തി. ബജറ്റിൽ ഇടം നേടിയ പദ്ധതികൾ ചുവടെ.
∙ അമരവിള ജെബിഎസ്, ആറയൂർ എൽവിഎച്ച്എസ്, പൊഴിയൂർ യുപിഎസ്, നെയ്യാറ്റിൻകര ജെബിഎസ്, ശാസ്താംതല യുപിഎസ് എന്നീ സ്കൂളുകൾക്ക് പുതിയ കെട്ടിടം.
∙ നെയ്യാറ്റിൻകര പോക്സോ – കുടുംബ കോടതികൾക്കു വേണ്ടി പുതിയ മന്ദിരം.
∙ പൊതുമരാമത്ത് റെസ്റ്റ് ഹൗസിൽ പുതിയ അതിഥി മന്ദിരം, കോംപ്ലക്സ് നിർമാണം.
∙ സിവിൽ സ്റ്റേഷൻ നവീകരണം
∙ അരുവിപ്പുറം – പെരുമ്പഴുതൂർ – കീളിയോട് – മാമ്പഴക്കര റോഡ്, വ്ലാത്താങ്കര – ആവണക്കിൻവിള – പൂഴിക്കുന്ന് റോഡ്, കൊറ്റാമം – പുതുക്കുളങ്ങര – അഞ്ചാലിക്കോണം റോഡ്, ആറയൂർ ക്ഷേത്രം – പൊൻവിള റോഡ്, പൂവാർ – ശങ്കുരുട്ടി റോഡ് എന്നിവയുടെ നവീകരണം.
∙ നെയ്യാർ നദി മുറിച്ചു കടക്കുന്നതിന് കുളത്തൂർ പഞ്ചായത്തിലെ ചാലക്കരയിലും നെയ്യാറ്റിൻകര നഗരസഭയിലെ ഓലത്താന്നി പാതിരിശ്ശേരിയിലും ചെമ്പരത്തിവിള അരുവിപ്പുറത്തും ക്രോസ് വേ നിർമാണം.
∙ നെയ്യാറ്റിൻകര താലൂക്ക് ആയുർവേദ ആശുപത്രി, പൊഴിയൂർ കുടുംബാരോഗ്യ കേന്ദ്രം, കാരോട് കുടുംബാരോഗ്യ കേന്ദ്രം എന്നിവയ്ക്ക് പുതിയ കെട്ടിടം.
∙ കിലയുടെ റീജനൽ ഓഫിസിന് സ്ഥലം ഏറ്റെടുക്കലും നിർമാണവും.
∙ ആറാലുംമൂട്, ഉദിയൻകുളങ്ങര മാർക്കറ്റുകളുടെ നവീകരണം.
