തൃശൂർ മേയറും സുരേഷ് ഗോപിയും കൂടിക്കാഴ്ച നടത്തി; വികസന പ്രവർത്തനങ്ങൾക്കു പിന്തുണ

തൃശൂർ ∙ മേയർ എം.കെ. വർഗീസും നിയുക്ത എംപി സുരേഷ് ഗോപിയും കൂടിക്കാഴ്ച നടത്തി. ഭാരത് ഹോട്ടലിൽ അവിചാരിതമായാണ് ഇരുവരും കണ്ടുമുട്ടിയതെന്നു ബിജെപി വൃത്തങ്ങൾ പറഞ്ഞു. എംപിയുടെ വികസന പ്രവർത്തനങ്ങൾക്കു മേയർ പിന്തുണ അറിയിച്ചിട്ടുണ്ട്. തൃശൂരിൽ സുരേഷ് ഗോപി തുടങ്ങിയതും ഇനി ആരംഭിക്കാൻ ലക്ഷ്യമിടുന്നതുമായ വികസന പ്രവർത്തനങ്ങൾക്കു കോർപറേഷന്റെ പിന്തുണയുണ്ടാകുമെന്നു മേയർ സുരേഷ് ഗോപിയോടു പറഞ്ഞു.

നേരത്തെ ലോക്സഭാ വോട്ടെടുപ്പിനു മുൻപു സുരേഷ് ഗോപി മിടുക്കനാണെന്നും എംപി ആകാൻ ഫിറ്റ് ആണെന്നും മേയർ പ്രശംസിച്ചതു വിവാദമായിരുന്നു. 2020–ലെ തദ്ദേശ തിരഞ്ഞെടുപ്പിൽ സ്വതന്ത്രനായി മത്സരിച്ചു ജയിച്ച എം.കെ. വർഗീസ് എൽഡിഎഫ് പിന്തുണയിലാണു മേയറായത്.