ഓടിക്കൊണ്ടിരുന്ന ബസിന്റെ ചില്ല് പൊട്ടിവീണു; കെഎസ്ആർടിസി ഡ്രൈവർക്കു പരുക്ക്

കുഴൽമന്ദം∙ ദേശീയപാതയിൽ ഓടിക്കൊണ്ടിരുന്ന കെഎസ്ആ൪ടിസി ബസിന്റെ മുൻവശത്തെ ചില്ലു പൊട്ടി ഡ്രൈവ൪ക്കു പരുക്കേറ്റു. തൃശൂ൪ ഡിപ്പോയിലെ സുശീലന്റെ (54) കൈക്കും വിരലിനുമാണു പരുക്കേറ്റത്. പരുക്ക് സാരമുള്ളതല്ല. യാത്രികർക്ക് ആർക്കും പരുക്കില്ല. ഇന്നലെ രാവിലെ ഒൻപതോടെ കണ്ണാടി മണലൂരിലായിരുന്നു സംഭവം. തൃശൂരിൽ നിന്നു പാലക്കാട്ടേക്കു വരികയായിരുന്ന ബസിന്റെ മുൻവശത്തെ ചില്ലു പെട്ടെന്നു പൊട്ടിവീഴുകയായിരുന്നു. എങ്ങനെ സംഭവിച്ചുവെന്നു വ്യക്തമല്ല. ചില്ലു ഘടിപ്പിച്ച ബീഡിങ് ഇളകിയിരുന്നില്ല. എങ്ങനെ സംഭവിച്ചുവെന്ന് അന്വേഷിച്ചുവരികയാണെന്നു കെഎസ്ആ൪ടിസി അധികൃതർ അറിയിച്ചു.