വിഡിയോ സച്ചിന്റെ ഇൻസ്റ്റഗ്രാം പേജിൽ, ഇൻസ്റ്റന്റ് പ്രശസ്തി; സച്ചിനെ കണ്ട വിസ്മയത്തിൽ ജോബിയും സുനീഷും

ചേർപ്പ് ∙ കോടന്നൂരിൽ നിന്നു കൊച്ചിയിലേക്ക് സ്പൈസ് കോസ്റ്റ് മാരത്തണിൽ പങ്കെടുക്കുവാൻ ടി.ആർ.ജോബിയും സുനീഷും പോകുമ്പോൾ മത്സരത്തിൽ പങ്കെടുക്കുകയെന്നതു മാത്രമായിരുന്നു മനസ്സിൽ. എന്നാൽ, ഇവർ തിരിച്ച് നാട്ടിലെത്തുമ്പോഴേക്കും രണ്ടു സുഹൃത്തുക്കളെയും ലോകം മുഴുവൻ സുപരിചിതരാക്കി. മാരത്തണിൽ പങ്കെടുക്കുന്നതിനിടെ ഇതിഹാസ ക്രിക്കറ്റ് താരം സച്ചിൻ തെൻഡുൽക്കർ ഇവരുമായി കണ്ടുമുട്ടിയതും പ്രോത്സാഹനം നൽകിയതുമായ വിഡിയോ സച്ചിന്റെ ഇൻസ്റ്റഗ്രാം പേജിൽ പങ്കുവച്ചതാണ് ഇൻസ്റ്റന്റ് പ്രശസ്തിയുടെ കാരണം. 

ഇന്നലെ രാവിലെയാണ് തൃശൂരിൽ നിന്നു ജോബിയും സുനീഷും അടങ്ങുന്ന 50 പേരടങ്ങിയ ഫിറ്റ്നസ് മെസഞ്ചേഴ്സ് സംഘം മാരത്തണിൽ പങ്കെടുക്കുവാൻ കൊച്ചിയിൽ എത്തിയത്. 42 കിലോമീറ്റർ മാരത്തണിൽ പങ്കെടുത്തു കൊണ്ടിരിക്കെ സുനീഷിന്റെ മസിലിന് വേദന കലശലായതിനെ തുടർന്നു ജോബിയും സുഹൃത്തുക്കളും ഓട്ടം നിർത്തി ഒരു വശത്തായി നിന്നപ്പോഴാണ് അതുവഴിയെത്തിയ സച്ചിൻ കാറിൽ നിന്നിറങ്ങി സംസാരിച്ചതും ഓട്ടം പൂർത്തിയാക്കാൻ പ്രോത്സാഹനം നൽകിയതും.