മെഡിക്കൽ കോളജ് ചുറ്റുമതിൽ തകർന്ന് നിലംപൊത്തുന്നു

മുളങ്കുന്നത്തുകാവ്∙ മെഡിക്കൽ കോളജിൽ ലക്ഷങ്ങൾ ചെലവഴിച്ചു നിർമിച്ച ചുറ്റുമതിൽ പലയിടത്തായി തകർന്ന് നിലം പൊത്തുന്നു. നിർമാണം പൂർത്തിയാക്കി അധികകാലം ഈട് നിൽക്കാതെയാണ് മതിലിന്റെ ഭാഗങ്ങൾ തകരുന്നത്.   നിർമാണത്തിലെ അപാകതയാണ് കാരണമെന്നാണ് ഈ മേഖലയിലെ വിദഗ്ധർ ചൂണ്ടിക്കാട്ടുന്നത്.

അക്കാദമിക് ബ്ലോക്കിന് സമീപമുള്ള മതിലിന്റെ ഒരു ഭാഗമാണ് തകർന്നത് . നെഹ്റു ക്ലബ്ബിനു സമീപം മതിലിന്റെ ഭാഗം രണ്ട് വർഷം മുൻപ് തകർന്നിരുന്നു. ഇവിടെ നിർമാണത്തിന് ഉപയോഗിച്ച കോൺക്രീറ്റ് കട്ടകൾ പൊളിച്ച് നീക്കിയതല്ലാതെ നിർമാണം ഇതുവരെ നടന്നിട്ടില്ല.  ഈയിടെ നിലം പൊത്തിയ മതിലിന്റെ കട്ടകൾ നീക്കം ചെയ്യുന്ന ജോലിയും  നടന്നിട്ടില്ല.