കടപ്പുറം പഞ്ചായത്തിൽ ടെട്രാപോഡ് സംരക്ഷണ ഭിത്തി പണിയും

ചാവക്കാട്∙കടപ്പുറം പഞ്ചായത്തിലെ കടൽക്ഷോഭം നേരിടുന്ന പ്രദേശങ്ങളിൽ ടെട്രാപോഡ് ഉപയോഗിച്ച് ആധുനിക രീതിയിൽ സംരക്ഷണ ഭിത്തി പണിയാൻ ശ്രമം ആരംഭിച്ചതായി എൻ.കെ.അക്ബർ എംഎൽഎ അറിയിച്ചു. ഇതിന്റെ ഭാഗമായി ലോക ബാങ്ക് അധികൃതർ, ഐഡിആർബി ഉദ്യോഗസ്ഥർ ശാസ്ത്രജ്ഞൻമാർ എന്നിവരടങ്ങുന്ന സംഘം കടപ്പുറം പഞ്ചായത്തിലെ കടൽക്ഷോഭ ബാധിത സ്ഥലങ്ങളിൽ സന്ദർശനം നടത്തി. 

എൻ.കെ.അക്ബർ എംഎൽഎ മന്ത്രി റോഷി അഗസ്റ്റിന് നിവേദനം നൽകിയതിനെ തുടർന്നാണ് ഉദ്യോഗസ്ഥ സംഘമെത്തിയത്. ടെട്രാപോഡ് ഉപയോഗിച്ച് രണ്ടര കീലോമീറ്റർ ഭിത്തി നിർമിക്കാൻ 60.5 കോടി രൂപയുടെ പദ്ധതിയാണ് സമർപ്പിച്ചിട്ടുള്ളത്. നിലവിൽ കടൽഭിത്തി തകർന്ന ഭാഗങ്ങളിൽ ഭിത്തി നിർമാണം ആരംഭിച്ചതായും ഇതുവരെ 60 ലക്ഷം രൂപയുടെ നിർമാണം നടത്തിയതായും എംഎൽഎ അറിയിച്ചു.