അറപ്പത്തോട്ടിൽ വെള്ളം കെട്ടിക്കിടക്കുന്നു

കയ്പമംഗലം ∙ കടലിൽ പ്രവേശിക്കുന്ന മോസ്കോ പാലത്തിനു കുറുകെ കടന്നു പോകുന്ന അറപ്പത്തോട്ടിൽ വെള്ളം കെട്ടിക്കിടക്കുന്നു. എടത്തിരുത്തി, കയ്പമംഗലം പഞ്ചായത്തുകളെ ബന്ധിപ്പിക്കുന്ന തോട്ടിൽ കിഴക്കൻ ഭാഗത്തെ മഴവെള്ളം കടലിലേക്ക് ഒഴുകിപ്പോകുന്ന പ്രധാന തോടാണിത്.

പലയിടത്തും തെങ്ങ് കടപുഴകി വീണ് കിടക്കുന്നതും വെള്ളത്തിന്റെ ഒഴുക്കിന് തടസ്സമാണ്. കുളവാഴയും പായലും പുല്ലും  നിറഞ്ഞ് കിടക്കുന്ന തോട്ടിലെ വെള്ളത്തിന് കറുപ്പ് നിറമായി.തോട്ടിൽ മാലിന്യം തള്ളുന്നതായും പരാതിയുണ്ട്. പരിസരത്തെ കുടുംബങ്ങൾക്കും തോട്ടിലെ മലിനജലം ഭീഷണിയാണ്. കടലിലേക്ക് വെള്ളം ഒഴുക്കി വിടണമെന്ന് നാട്ടുകാർ ആവശ്യപ്പെട്ടു.