പാർക്കിങ് പഴയപടി; പനമരത്ത് ഗതാഗത തടസ്സം പതിവ്

പനമരം ∙ ടൗണിൽ പഴയ നടവയൽ റോഡിൽ പാർക്കിങ് തോന്നിയപോലെ ആയതോടെ ഗതാഗത തടസ്സം പതിവാകുന്നു. ടൗണിലെത്തുന്നവർ പാതയോരത്ത് വാഹനങ്ങൾ അലക്ഷ്യമായി തലങ്ങും വിലങ്ങും നിർത്തിയിടുന്നതും ടൗണിൽ ഓട്ടോറിക്ഷകളുടെ എണ്ണം കൂടുമ്പോൾ ഈ റോഡിലേക്ക് പാർക്കിങ് നീളുന്നതും ഗതാഗതക്കുരുക്കിന് കാരണമെന്ന് നാട്ടുകാരും വ്യാപാരികളും ആരോപിക്കുന്നു. അനധികൃത പാർക്കിങ് മൂലം ചാലിൽ ഭാഗത്തേക്കു പോകണമെങ്കിൽ വഴിയിൽ വാഹനം നിർത്തിയിടുന്നവരുടെ കാലുപിടിക്കേണ്ട അവസ്ഥയാണ്.

പനമരം - ബീനാച്ചി റോഡിലെ ചെറിയ പാലം പണി നടക്കുന്നതിനാൽ പഴയ നടവയൽ റോഡ് അടച്ചതോടെ ചാലിൽ ഭാഗത്തുള്ളവർക്ക് ടൗണിൽ എത്താൻ ഇതല്ലാതെ മറ്റൊരു വഴിയില്ല. മാനന്തവാടി - കൽപറ്റ സംസ്ഥാന പാതയിലേക്ക് കയറുന്ന ടൗണിലെ ഈ വീതി കുറഞ്ഞ റോഡിന്റെ തുടക്ക ഭാഗത്ത് തന്നെ വാഹനങ്ങൾ നിർത്തിയിടുന്നതു മൂലം വാഹനങ്ങൾ പ്രധാന റോഡിൽ നിന്ന് ചാലിൽ ഭാഗത്തെ റോഡിലേക്ക് തിരിക്കുമ്പോഴുണ്ടാകുന്ന ഗതാഗതക്കുരുക്കഴിക്കാൻ മിനിറ്റുകളോളം എടുക്കും.