‘കേരള’ പിഎച്ച്ഡി എൻട്രൻസ് തുടരും

തിരുവനന്തപുരം ∙ പിഎച്ച്ഡി പ്രവേശനപരീക്ഷ കേരള സർവകലാശാല തുടർന്നും നടത്തും. യുജിസി–നെറ്റ് യോഗ്യതയുള്ളവരെയും സർവകലാശാലയുടെ പ്രവേശനപരീക്ഷ പാസാകുന്നവരെയും ഒരുപോലെ പ്രവേശനത്തിനു പരിഗണിക്കാമെന്ന് ഇതുസംബന്ധിച്ചു പഠനം നടത്തിയ സിൻഡിക്കറ്റ് ഉപസമിതി ശുപാർശ ചെയ്തു. സിൻഡിക്കറ്റ് റിപ്പോർട്ട് അംഗീകരിച്ചു.നെറ്റ് സ്കോർ പിഎച്ച്ഡി പ്രവേശന മാനദണ്ഡമാക്കുന്നതു പരിഗണിക്കാൻ യുജിസി മാർച്ചിൽ സർവകലാശാലകൾക്കു നിർദേശം നൽകിയിരുന്നു. ഇക്കൊല്ലം പ്രവേശനപരീക്ഷയ്ക്കുള്ള നടപടികൾ എംജി സർവകലാശാല നിർത്തിവച്ചിരുന്നു.