കേരളത്തിലെ രക്ഷാദൗത്യത്തിന് ചെലവാക്കിയ പണം ആവശ്യപ്പെട്ട് കേന്ദ്രം; ഇതാണ് ആ 132.61കോടിയുടെ വിവരങ്ങൾ | Fact Check

വയനാട് രക്ഷാദൗത്യത്തിന് വ്യോമസേന ചെലവഴിച്ച തുക ആവശ്യപ്പെട്ട് കേന്ദ്രം കേരളത്തിന് കത്ത് നല്‍കിയതുമായി ബന്ധപ്പെട്ട വിഷയം വലിയ രീതിയില്‍ ചര്‍ച്ചകള്‍ക്ക് വഴിവച്ചിരിക്കുകയാണ്. റവന്യു മന്ത്രി കെ.രാജന്‍ ഉള്‍പ്പെടെയുള്ള നേതാക്കള്‍ കേന്ദ്രത്തിന്റെ ഈ നടപടിക്കെതിരെ രംഗത്ത് വന്നിട്ടുണ്ട്. ദുരന്തനിവാരണത്തിന് വേണ്ടി ചില്ലിക്കാശുപോലും നല്‍കാതെയാണ് കേന്ദ്രം ഇത്തരത്തില്‍ കേരളത്തോട് വിവേചനം കാണിക്കുന്നതെന്ന രീതിയില്‍ സോഷ്യല്‍ മീഡിയയിലും ഈ വിഷയം ചര്‍ച്ചയാണ്. ദുരന്തത്തില്‍ വരെ കേന്ദ്രസര്‍ക്കാര്‍ രാഷ്ട്രീയ വൈരാഗ്യം കാണിക്കുന്നുവെന്നാണ് സോഷ്യല്‍ മീഡിയ പ്രചാരണം.  ചില പോസ്റ്റുകളില്‍ ദുരന്തനിവാരണ ഫണ്ടില്‍ നിന്ന് പണം നല്‍കാന്‍ സംസ്ഥാനം തീരുമാനിച്ചെന്നും ചിലതില്‍ കേന്ദ്രം വാങ്ങിയെടുത്തുവെന്നുമെല്ലാം അവകാശവാദങ്ങളുണ്ട്.

എന്നാല്‍, കേന്ദ്രം ആവശ്യപ്പെട്ട 132.61 കോടി രൂപയുടെ വിശദാംശങ്ങളെപ്പറ്റിയുള്ള ഞങ്ങളുടെ അന്വേഷണത്തില്‍ ഇത് 'Government Accounting Rules, 1990' പ്രകാരം സംസ്ഥാന സര്‍ക്കാര്‍ സൈന്യത്തിന് നല്‍കേണ്ട തുകയാണെന്ന് വ്യക്തമായി. 

∙ അന്വേഷണം

രക്ഷാദൗത്യത്തിന് ചെലവാക്കിയ പണം ആവശ്യപ്പെട്ട് കേന്ദ്ര സര്‍ക്കാര്‍ കത്ത് നല്‍കിയതുമായി ബന്ധപ്പെട്ട വാര്‍ത്തകളാണ് ഞങ്ങള്‍ ആദ്യം പരിശോധിച്ചത്. ഓണ്‍മനോരമ ഡിസംബര്‍ 13ന് നല്‍കിയ വാര്‍ത്ത പ്രകാരം 2006 മുതല്‍ സംസ്ഥാനത്തുണ്ടായ നിരവധി ദുരന്തങ്ങള്‍ പട്ടികപ്പെടുത്തിയാണ് വ്യോമസേന കത്തയച്ചിട്ടുള്ളത്. ഇവയില്‍ 2019ലെ പ്രളയത്തില്‍ ഉള്‍പ്പെടെ വ്യോമസേനയ്ക്ക് ചെലവായ തുകയാണ് ഇപ്പോള്‍ ആവശ്യപ്പെട്ടിട്ടുള്ളത്. വയനാട് പുനരധിവാസത്തിനായി 2000 കോടി രൂപ കേന്ദ്രത്തോട് സംസ്ഥാന സര്‍ക്കാര്‍ ആവശ്യപ്പെട്ടിരിക്കുന്നതിനിടെയാണ് രക്ഷാ ദൗത്യത്തിനായി വ്യോമസേനയ്ക്ക് ചെലവായ തുക തിരിച്ചടയ്ക്കാന്‍ കേന്ദ്രം കത്തു നല്‍കിയിട്ടുള്ളത്. 69,65,46,417 കോടി രൂപയാണ് വയനാട്ടിലെ എയര്‍ ലിഫ്റ്റിംഗിനായി വ്യോമസേനയ്ക്ക് ചെലവായിട്ടുള്ളതെന്നും വാര്‍ത്തയിലുണ്ട്. 

മനോരമ ന്യൂസ്, മാതൃഭൂമി തുടങ്ങിയ മറ്റ് മാധ്യമങ്ങളിലും സമാനമായ വാര്‍ത്തയുണ്ട്. ദി ന്യൂ ഇന്ത്യന്‍ എക്‌സ്പ്രസ് ഡിസംബര്‍ 14ന് നല്‍കിയ വാര്‍ത്തയില്‍ പറയുന്നത് 'Instructions on aid to Civil Authority by the Armed Forces - 1970' പ്രകാരമാണ് സൈന്യം സംസ്ഥാനങ്ങള്‍ക്ക് സഹായം നല്‍കുന്നതെന്നാണ്.

സൈന്യത്തിന്റെ സേവനങ്ങള്‍ക്ക് പണം ഈടാക്കാനാകുമോ?

ഇതുസംബന്ധിച്ച വിവരങ്ങള്‍ക്കായി ഞങ്ങള്‍ കീവേഡ് പരിശോധന നടത്തി. ദുരന്തനിവാരണം ഉള്‍പ്പെടെയുള്ള ആവശ്യങ്ങള്‍ക്കായി സംസ്ഥാനങ്ങള്‍ക്കോ കേന്ദ്രഭരണ പ്രദേശങ്ങള്‍ക്കോ സൈന്യത്തിന്റെ സഹായം ആവശ്യപ്പെടാവുന്നതാണ്. ഇതിനുള്ള തുക അതത് സംസ്ഥാന സര്‍ക്കാരുകളാണ് വഹിക്കേണ്ടത്. 'The Government Accounting Rule, 1990' ല്‍  ഇക്കാര്യം വിശദമായി പ്രതിപാദിക്കുന്നുണ്ട്. നിയമത്തിന്റെ അനുബന്ധം-5, റൂള്‍ 2(1)ലാണ് സൈനീക സേവനങ്ങള്‍ക്ക് പണം ഈടാക്കുന്നത് സംബന്ധിച്ച വിശദാംശങ്ങളുള്ളത്. ക്രമസമാധാനപാലനം ഒഴികെയുള്ള എല്ലാ സേവനങ്ങള്‍ക്കും അതത് സംസ്ഥാന സര്‍ക്കാരുകളാണ് പണം മുടക്കേണ്ടതെന്ന് നിയമത്തില്‍ വ്യക്തമാക്കുന്നുണ്ട്. ഇതു സംബന്ധിച്ച നിയമത്തിന്റെ പ്രസക്തഭാഗം  കാണാം.

കേരളത്തിന്റെ പ്രതികരണം

രക്ഷാ ദൗത്യത്തിനുള്ള തുക ഒഴിവാക്കി തരണമെന്ന് കേരളം ആവശ്യപ്പെടുമെന്ന് വാര്‍ത്തകളുണ്ട്. നിലവില്‍ വയനാട് ദുരന്തനിവാരണവുമായി ബന്ധപ്പെട്ട് ഹൈക്കോടതി പരിഗണിക്കുന്ന കേസില്‍ ഇക്കാര്യം കൂടി ഉള്‍പ്പെടുത്തണമെന്ന് ആവശ്യപ്പെടുമെന്ന റിപ്പോര്‍ട്ടുകളുമുണ്ട് ഇതു സംബന്ധിച്ച വിശദീകരണത്തിനായി ഞങ്ങള്‍ കേരള സ്‌റ്റേറ്റ് ഡിസാസ്റ്റര്‍ മാനേജ്‌മെന്റ് അതോറിറ്റി (KSDMA) മെമ്പര്‍ സെക്രട്ടറി ഡോ. ശേഖര്‍ ലൂക്കോസ് കുര്യാക്കോസിനെ ബന്ധപ്പെട്ടു. " ഇക്കഴിഞ്ഞ ഒക്ടോബറിലാണ് വ്യോമസേനയ്ക്ക് ചെലവായ തുക ആവശ്യപ്പെട്ടുകൊണ്ടുള്ള കത്ത് സര്‍ക്കാരിന് ലഭിച്ചത്. ഇത്രയധികം തുക ഒന്നിച്ച് അടയ്ക്കാന്‍ സംസ്ഥാനത്തിന്റെ നിലവിലെ അവസ്ഥയില്‍ സാധിക്കില്ല. അതിനാല്‍ പ്രതിരോധമന്ത്രാലയത്തിന് കൈമാറേണ്ട ഈ തുക കേന്ദ്ര സര്‍ക്കാര്‍ നല്‍കണമെന്ന് സംസ്ഥാനം കത്തയച്ചിട്ടുണ്ട്. നവംബര്‍ 24ന് അയച്ച കത്തിന് ഇതുവരെ മറുപടി വന്നിട്ടില്ല. 2018ലെ പ്രളയത്തെ തുടര്‍ന്ന് സമാനമായ ബില്‍ വന്നപ്പോള്‍ തുക കുറച്ച് നല്‍കണമെന്നാവശ്യപ്പെട്ട് കത്ത് നല്‍കിയിരുന്നു. ഇപ്പോഴത്തെ വിഷയത്തില്‍ മറ്റുള്ള നടപടിക്രമങ്ങളൊക്കെ സര്‍ക്കാര്‍ ആലോചിച്ച് തീരുമാനിക്കും " ഡോ.ശേഖര്‍ പറഞ്ഞു.  

വ്യോമസേനയുടെ ബില്‍ കേരളത്തിന് മാത്രമോ?

കേരളത്തിന് പുറമെ മറ്റേതെങ്കിലും സംസ്ഥാനങ്ങളോട് വ്യോമസേന ഇത്തരത്തില്‍ ദുരന്ത നിവാരണത്തിന് ചെലവായ തുക ആവശ്യപ്പെട്ടിരുന്നോ എന്നും ഞങ്ങള്‍ പരിശോധിച്ചു. ഉത്തരാഖണ്ഡ് സംസ്ഥാനത്തിന് 207 കോടി രൂപയാണ് വ്യോമസേനയുടെ ബില്‍ നല്‍കാനുണ്ടായിരുന്നത്. സംസ്ഥാനം രൂപീകരിച്ച 2000 മുതല്‍ വിവിധ കാലഘട്ടങ്ങളിലായി വ്യോമസേന ദുരിതാശ്വാസ പ്രവര്‍ത്തനങ്ങള്‍ക്ക് ചെലവഴിച്ച ഈ തുക സെറ്റില്‍ ചെയ്തായി 2024 നവംബര്‍ 16ന് ടൈംസ് ഓഫ് ഇന്ത്യ വാര്‍ത്ത നല്‍കിയിട്ടുണ്ട്. ഒഡിഷ, ജമ്മു കശ്മീര്‍ തുടങ്ങിയ സംസ്ഥാനങ്ങളില്‍ വ്യോമസേന ദുരിതാശ്വാസ പ്രവര്‍ത്തനങ്ങള്‍ക്ക് ബില്‍ നല്‍കിയതു സംബന്ധിച്ച വാര്‍ത്തകളും ഞങ്ങള്‍ കണ്ടെത്തി.

മുന്‍കാലങ്ങളിലെ സ്ഥിതി

കേരളം മുന്‍കാലങ്ങളില്‍ ഇത്തരം ബില്ലുകള്‍ കൈകാര്യം ചെയ്തിരുന്നതിനെപ്പറ്റിയും ഞങ്ങള്‍ അന്വേഷിച്ചു. ഇതിനായി മുന്‍ ചീഫ് സെക്രട്ടറി ജിജി തോംസണെ ഞങ്ങള്‍ ബന്ധപ്പെട്ടു. " സൈന്യം നല്‍കുന്ന സേവനങ്ങള്‍ക്ക് അതത് സംസ്ഥാന സര്‍ക്കാരുകളാണ് പണം നല്‍കേണ്ടത്. ഞാന്‍ സര്‍വീസിലുണ്ടായിരുന്നപ്പോഴും ഇത്തരത്തില്‍ നിരവധി ബില്ലുകള്‍ കൈകാര്യം ചെയ്തിരുന്നു. വലിയ തുകയാണെങ്കില്‍ പലപ്പോഴും ഒരുമിച്ച് നല്‍കാന്‍ സംസ്ഥാനത്തിന് പരിമിതിയുണ്ടാകും. ഇത്തരം സമയങ്ങളില്‍ കേന്ദ്രത്തോട് സാവകാശം ആവശ്യപ്പെടും. പലപ്പോഴും സാവകാശം ലഭിക്കാറുണ്ട്. സംസ്ഥാനങ്ങള്‍ക്ക് കേന്ദ്രം നല്‍കുന്ന ഫണ്ടില്‍ നിന്ന് ഇവ കുറയ്ക്കുകയാണ് പതിവ്. വലിയ തുക ഒരുമിച്ച് നല്‍കേണ്ടി വരുന്നത് സര്‍ക്കാരിന്റെ ദൈനംദിന പ്രവര്‍ത്തനങ്ങളെ ബാധിക്കും, " ജിജി തോംസണ്‍ പറഞ്ഞു. 

∙ വാസ്തവം

വ്യോമസേനയ്ക്ക് ചെലവായ തുക അതത് സംസ്ഥാന സര്‍ക്കാരുകളില്‍ നിന്ന് ഈടാക്കാന്‍ നിയമപ്രകാരം കേന്ദ്രത്തിന് അനുവാദമുണ്ടെന്ന് വ്യക്തമായി. എന്നാലിതിന് സാവകാശം നല്‍കാനോ ദുരന്തനിവാരണ ഫണ്ടില്‍ നിന്ന് ഈടാക്കാനോ കേന്ദ്ര സര്‍ക്കാരിന് സാധിക്കുമെന്നതും ശ്രദ്ധേയമാണ്.

( രാജ്യത്തെ തിരഞ്ഞെടുപ്പുകളിൽ വ്യാജപ്രചാരണങ്ങൾ തടയാൻ രൂപീകരിച്ച ശക്തി കലക്ടീവിന്റെ  ഭാഗമായി ഇന്ത്യാ ടുഡേ പ്രസിദ്ധീകരിച്ച ഫാക്ട്ചെക്കിൽ നിന്ന് )

English Summary: It is clear that the Center is allowed by law to recover the amount spent on the Air Force from the respective state governments