ജര്‍മനിയിലെ മൂന്നിലൊന്ന് കമ്പനികളുടെയും ഭാവി ആശങ്കയിൽ

ബര്‍ലിന്‍ ∙ ജർമൻ കമ്പനികളുടെ മൂന്നിലൊന്നും ഭാവിയിൽ നിലനിൽക്കുമോയെന്ന ആശങ്കയിലാണെന്ന് ജർമൻ ഇക്കണോമിക് ഇന്‍സ്ററിറ്റ്യൂട്ട് (ഐഡബ്ല്യു)  സർവേ വെളിപ്പെടുത്തി. പലിശ നിരക്കുകളുടെ വർധനവ്, മന്ദഗതിയിലുള്ള ആഗോള വളർച്ച, യുക്രെയ്‌നിലെ യുദ്ധം, റഷ്യയുമായുള്ള വാതക സംഘർഷം എന്നിവ കാരണം ജർമൻ കമ്പനികൾ പ്രതിസന്ധിയിലാണ്. ഈ വർഷം ഉൽപാദനം കുറയ്ക്കുമെന്ന് മൂന്നിലൊന്ന് കമ്പനികളും പ്രതീക്ഷിക്കുന്നു. 2024-ൽ 0.1% മാത്രമേ വളർച്ചയുണ്ടാകൂ എന്നും 2025-ൽ 1.4% വളർച്ചയെ പ്രതീക്ഷിക്കുന്നുവെന്നും സർവേ പറയുന്നു. 

ഈ സാഹചര്യം ജർമൻ തൊഴിൽ വിപണിയെയും ബാധിക്കുമെന്ന് വിദഗ്ധർ മുന്നറിയിപ്പ് നൽകുന്നു. തൊഴിലില്ലായ്മ വർധിക്കാനും ഉപഭോക്തൃ ചെലവ് കുറയ്ക്കാനും സാധ്യതയുണ്ട്. ഈ പ്രതിസന്ധിയിൽ നിന്ന് കരകയറാൻ ജർമൻ സർക്കാർ ചെറുകിട, ഇടത്തരം സംരംഭങ്ങളെ സഹായിക്കുന്ന നയങ്ങൾ നടപ്പിലാക്കേണ്ടതുണ്ട്. ഊർജ്ജ വില ഉയർച്ചയിൽ നിന്ന് ഉപഭോക്താക്കളെ സംരക്ഷിക്കാനുള്ള നടപടികളും ആവശ്യമാണ്.

ജർമൻ സമ്പദ്‌വ്യവസ്ഥയ്ക്ക് വലിയ തിരിച്ചടി നൽകുന്നതാണ് ലോകബാങ്കിന്റെ ഏറ്റവും പുതിയ പ്രവചനം. കയറ്റുമതിയിൽ വളരെയധികം ആശ്രയിച്ചിരിക്കുന്ന ജർമനിക്ക്, ഈ വർഷം ആഗോള വളർച്ച 2.4% ആയി മന്ദഗതിയിലാകുമെന്ന് ലോകബാങ്ക് പ്രവചിക്കുന്നു. 30 വർഷത്തിനിടെ ആഗോളതലത്തിൽ മൊത്ത ആഭ്യന്തര ഉൽപാദനത്തിൽ (ജിഡിപി) അര ദശകത്തിലെ ഏറ്റവും മന്ദഗതിയിലുള്ള വളർച്ചയാണിത്.

∙ ജർമൻ കമ്പനികള്‍ പറയുന്നത്
ജർമൻ ഇക്കണോമിക് ഇൻസ്റ്റിറ്റ്യൂട്ട് (ഐഡബ്ല്യു) നടത്തിയ സർവേ പ്രകാരം, ജർമൻ കമ്പനികളിൽ 37% വും ഈ വർഷം ഉൽപ്പാദനം കുറയുമെന്ന് പ്രതീക്ഷിക്കുന്നു. 23% കമ്പനികൾ മാത്രമാണ് ഉൽപാദനം വർദ്ധിക്കുമെന്ന് പ്രതീക്ഷിക്കുന്നത്. സർവേ പ്രകാരം, ഈ വർഷം ജർമൻസമ്പദ്‌വ്യവസ്ഥ വീണ്ടെടുക്കാൻ സാധ്യതയില്ല. വ്യാവസായിക, നിർമാണ മേഖലകളിലെ സാധ്യതകൾ വളരെ മോശമാണെന്ന് സർവേ കണ്ടെത്തി.

39% കമ്പനികളും അവരുടെ നിലവിലെ പ്രകടനം ഒരു വർഷം മുൻപുള്ളതിനേക്കാൾ മോശമാണെന്ന് വിശ്വസിക്കുന്നു. 23% കമ്പനികളും തൊഴിലവസരങ്ങളിൽ വർധനവ് പ്രതീക്ഷിക്കുന്നു. 34% സേവന സ്ഥാപനങ്ങളും തൊഴിലവസരങ്ങൾ സൃഷ്ടിക്കാനും നിക്ഷേപം വർധിപ്പിക്കാനും ആഗ്രഹിക്കുന്നു പലിശ നിരക്കുകളുടെ വർധനവ് കാരണം വായ്പകൾ എടുക്കുന്നതും നിക്ഷേപം നടത്തുന്നതും കൂടുതൽ ചെലവേറിയതാക്കുന്നു. ലോകമെമ്പാടുമുള്ള സാമ്പത്തിക മാന്ദ്യം ജർമൻകമ്പനികളെ ബാധിക്കുമെന്നാണ് കരുതപ്പെടുന്നത്..