മകനെ സന്ദർശിക്കാനെത്തിയ പിതാവ് ഡെർബിയിൽ ഹൃദയാഘാതം മൂലം മരിച്ചു; വിടപറഞ്ഞത് കണ്ണൂർ സ്വദേശി സ്കറിയ

ഡെർബി ∙ മകനെ സന്ദർശിക്കുവാനായി നാട്ടിൽ നിന്നും എത്തിയ പിതാവ് ഹൃദയാഘാതത്തെ തുടർന്ന് യുകെയിലെ ഡെർബിയിൽ അന്തരിച്ചു. ഇരിട്ടി കീഴ്പ്പള്ളി സ്വദേശിയും, തലശ്ശേരി സെഷൻസ് കോടതി റിട്ടേർഡ് സൂപ്രണ്ടുമായ വരിക്കമാക്കൽ സ്കറിയ (67) ആണ് അന്തരിച്ചത്. റിട്ടേർഡ്  അധ്യാപികയായ ഭാര്യ സിസിലിയോടൊപ്പം, ഡെർബിയിൽ താമസിക്കുന്ന മകൻ സച്ചിൻ ബോസിന്റെ ഭവനം സന്ദർശിക്കാനാണ് സ്കറിയ എത്തിയത്.

ഒരു മാസം മുമ്പാണ് സച്ചിന്റെ മാതാപിതാക്കൾ യുകെയിൽ എത്തുന്നത്. സ്‍കോട്‍ലൻഡടക്കം വിവിധ സ്ഥലങ്ങൾ സന്ദർശിച്ച് കഴിഞ്ഞ ദിവസമാണ് ഡെർബിയിൽ തിരിച്ചെത്തിയത്.  ഇന്നലെ  നടക്കിനിറങ്ങിയ സ്കറിയ, തിരിച്ചു വരാൻ താമസിച്ചതിനാൽ കുടുംബാംഗങ്ങൾ നടത്തിയ അന്വേഷണത്തില്‍, വഴിയിൽ ബോധരഹിതനായി വീണുകിടന്ന ഏഷ്യക്കാരനെ ആംബുലൻസ് എത്തി ഹോസ്പിറ്റലിലേക്ക് മാറ്റിയ വിവരം അറിയുവാൻ കഴിഞ്ഞു. 

ഹോസ്പിറ്റലിൽ എത്തുമ്പോഴാണ് തങ്ങളുടെ പിതാവ് മരണപ്പെട്ട ഹൃദയഭേദകമായ വിവരം സച്ചിനും കുടുംബവും അറിയുന്നത്. മാതാപിതാക്കളെ തങ്ങളോടൊപ്പം കുറച്ചു കാലം താമസിപ്പിക്കുവാനുള്ള  സച്ചിന്റെ ആഗ്രഹവും, പേരക്കുട്ടികളോടൊപ്പം സമയം ചിലവഴിക്കുവാനുള്ള സ്കറിയായുടെ അഭിലാഷവുമാണ് ഇവിടെ വിധി കവർന്നെടുത്തത്.  ഇന്നലെ പരേതനുവേണ്ടി പ്രാർഥനകൾ അർപ്പിച്ചിരുന്നു. മരണ വാർത്ത അറിഞ്ഞു ഫാ. ടോമി എടാട്ട്  ഭവനം സന്ദർശിക്കുകയും, പരേതനുവേണ്ടി പ്രാർഥിക്കുകയും ചെയ്തു.

അന്ത്യ ശുശ്രൂഷകൾ നാട്ടിൽ നടത്തി വെളിമാനം സെന്റ് സെബാസ്റ്റ്യൻസ് പള്ളി കുടുംബക്കല്ലറയിൽ സംസ്കരിക്കുവാനാണ് കുടുംബാംഗങ്ങളുടെ തീരുമാനം. ഇന്നും നാളെയും അവധി ദിനങ്ങളായതിനാൽ മൃതദേഹം നാട്ടിലെത്തിക്കുവാനുള്ള നടപടികൾ തിങ്കളാഴ്ച ആരംഭിക്കും.

 സച്ചിന്റെ കുടുംബത്തോടൊപ്പം സഹായവും സാന്ത്വനവുമായി ബന്ധുക്കളും സുഹൃത്തുക്കളും ഡെർബി മലയാളികളും  ഉണ്ട്.  സഫിൻ (യുഎഇ) സാൽബിൻ (ബെം ഗളൂരു) എന്നിവരാണ് മറ്റു മക്കള്‍. ആര്യ (മരുമകൾ) റിക്കി (പൗത്രൻ).