ജര്‍മനിയില്‍ ഫെബ്രുവരി 23ന് പൊതു തിരഞ്ഞെടുപ്പ്

ബര്‍ലിന്‍ ∙ കഴിഞ്ഞയാഴ്ച മധ്യഇടതു സർക്കാർ തകർന്നതിനെത്തുടർന്ന് ജർമനിയിൽ പുതിയ തിരഞ്ഞെടുപ്പ് നടത്താൻ തീരുമാനിച്ചു. സോഷ്യൽ ഡെമോക്രാറ്റുകളും (എസ്‌പിഡി) ക്രിസ്ത്യൻ ഡെമോക്രാറ്റുകളും (സിഡി) തമ്മിലുള്ള ചർച്ചയിൽ 2025 ഫെബ്രുവരി 23ന് തിരഞ്ഞെടുപ്പ് നടത്താൻ തീരുമാനിച്ചു. ഇതിനു മുൻപ്, ഡിസംബർ 16ന് ചാൻസലർ ഒലാഫ് ഷോൾസ് വിശ്വാസവോട്ട് നേടാൻ ശ്രമിക്കും. അദ്ദേഹം ഈ വോട്ടിൽ തോൽക്കുകയാണെങ്കിൽ, രാഷ്ട്രപതിക്ക് പാർലമെന്റ് പിരിച്ചുവിടാൻ 21 ദിവസം സമയമുണ്ട്.

ഏറ്റവും പുതിയ സർവേകൾ പ്രകാരം, സിഡിയും അവരുടെ ബവേറിയൻ സഖ്യകക്ഷിയായ സിഎസ്യുവും 32 ശതമാനം വോട്ടുകൾ നേടാനുള്ള സാധ്യതയുണ്ട്. തീവ്രവലതുപക്ഷ പാർട്ടിയായ അഫ്‌ഡി രണ്ടാം സ്ഥാനത്താണ്. ഷോൾസിന്റെ സോഷ്യൽ ഡെമോക്രാറ്റുകൾക്ക് 15 ശതമാനം വോട്ടുകൾ ലഭിക്കുമെന്നാണ് പ്രതീക്ഷ. ധനമന്ത്രിയുമായി ഉണ്ടായ തർക്കത്തെത്തുടർന്നാണ് ഭരണസഖ്യം തകർന്നത്. 2021 നവംബറിൽ അധികാരത്തിൽ വന്ന ഈ സഖ്യം, സമീപകാല തിരഞ്ഞെടുപ്പുകളിൽ പരാജയപ്പെട്ടിരുന്നു.