മെലീഹ ക്ഷണിക്കുന്നു; വരൂ, കുതിരയോട്ടത്തിന്റെ ഹരം നുകരാം

ഷാർജ∙ ഗൾഫിന്റെ ചരിത്രവും പുരാവസ്തു ശാസ്ത്രവും അടുത്തറിയണോ? മരുഭൂമിയില്‍ സാഹസികയാത്ര നടത്തണോ, കുതിരയോട്ടത്തിന്റെ ഹരം നുകരണോ?... മലീഹയിലേയ്ക്ക് വരൂ, വേനൽക്കാല ആഘോഷങ്ങൾക്ക് നിറം പകരാൻ ചരിത്രവും വിജ്ഞാനവും സാഹസികതയും ഒരുമിക്കുന്ന വിനോദങ്ങളൊരുക്കി മെലീഹ ആർക്കിയോളജിക്കൽ സെന്റർ നിങ്ങളെ കാത്തിരിക്കുന്നു.

കോവിഡ് പ്രതിരോധത്തിനായി യുഎഇ സർക്കാർ നിർദേശിച്ച ആരോഗ്യ സുരക്ഷാ പ്രോട്ടോകോളുകളെല്ലാം പാലിച്ചാണ് ഷാർജ നിക്ഷേപവികസന വകുപ്പിന് കീഴിലുള്ള മെലീഹ പുരാവസ്തു കേന്ദ്രം സന്ദർശകർക്കായി വാതിൽ തുറക്കുന്നത്. പ്രദേശത്തെ വ്യത്യസ്തമായ മരുഭൂ കാഴ്ചകൾ കുതിരപ്പുറത്തേറി കാണാനാവുന്ന പാക്കേജുകളാണ് മെലീഹയിലെ പുതിയ ആകർഷണം. കുട്ടികളടക്കമുള്ളവർക്ക് ഇതിന്റെ ഭാഗമാവാം. മുൻ പരിചയമില്ലാത്തവർക്ക് പരിശീലകരുടെ സഹായമുണ്ടാവും. കുറച്ചു നേരത്തെ യാത്രയ്ക്ക് പകരം കുതിരയോട്ടം വിശദമായി പഠിക്കാൻ ആഗ്രഹമുള്ളവർക്കായി പ്രത്യേക പരിശീലന കോഴ്സുകളും മെലീഹ ആർക്കിയോളജി സെന്ററിൽ ഒരുക്കിയിട്ടുണ്ട്.

മ്യൂസിയം സന്ദർശനം മറ്റൊരു വിശേഷം

അറബ് ഭൂപ്രദേശത്തിന്റെ തന്നെ സമഗ്രചരിത്രം വിശദമായി മനസ്സിലാക്കാൻ സഹായിക്കുന്ന മ്യൂസിയം സന്ദർശനമാണ് വേനൽകാലത്ത് ആസ്വദിക്കാൻ പറ്റിയ മറ്റൊരു മെലീഹ വിശേഷം. ആഫ്രിക്കയിൽ നിന്നുള്ള ആദിമമനുഷ്യരുടെ സഞ്ചാരവുംകുടിയേറ്റവും നൂറ്റാണ്ടുകൾക്ക് മുൻപേ ഇന്ത്യയടക്കമുള്ള പ്രദേശങ്ങളുമായി നിലനിന്നിരുന്ന കച്ചവടബന്ധവുമെല്ലാം അടുത്തറിയാം. നൂറ്റാണ്ടുകൾ പഴക്കമുള്ള ശവക്കല്ലറകൾ സംരക്ഷിക്കുന്നതോടൊപ്പം അപൂർവമായ പുരാവസ്തു ശേഷിപ്പുകളും ഇവിടെ പ്രദർശിപ്പിച്ചിട്ടുണ്ട്. ചരിത്രവും മരുഭൂമിയിലെസവിശേഷ ജൈവവൈവിധ്യവും കൂടുതൽ മനസ്സിലാക്കാനും പഠിക്കാനും പാകത്തിലുള്ള വിദ്യാഭ്യാസ വർക് ഷോപ്പുകളും ഉണ്ട്. കുട്ടികൾക്കും മുതിർന്നവർക്കും ഒരുപോലെ ഉപകാരപ്രദമാവുന്ന വിധമാണ് ഇതൊരുക്കിയിരിക്കുന്നത്.

ഫോസിൽ റോക്ക്; ക്യാമൽ റോക്ക്

സാഹസികതയുടെ മേമ്പൊടിയുള്ള അനുഭവങ്ങൾ തേടുന്ന സഞ്ചാരികൾക്ക്  ഫോസിൽ റോക്ക്, ക്യാമൽ റോക്ക് എന്ന കാഴ്ചകളാസ്വദിച്ചു കൊണ്ട് ഡെസേർട്ട് സഫാരി നടത്താനുള്ള അവസരവും മെലീഹയിലുണ്ട്. കൃത്യമായ ഇടവേളകളിൽ അണുനശീകരണം നടത്തുന്ന 4x4 വാഹനങ്ങളിൽ ധൈര്യമായി മരൂഭൂമിയിലെ വേറിട്ട കാഴ്ചകൾ ആസ്വദിക്കാം. തനത് എമിറാത്തി അനുഭൂതി പകരുന്ന 'സൺസെറ്റ് ലോഞ്ച്', രാത്രി മുഴുവൻ ആകാശക്കാഴ്ചകളാസ്വദിച്ച് മരുഭൂമിയിൽ ക്യാംപ് ചെയ്യാൻ അവസരമൊരുക്കുന്ന 'നൈറ്റ് ക്യാംപ്', ആകാശക്കാഴ്ചകളുടെ വിസ്മയച്ചെപ്പ് തുറക്കുന്ന വാനനിരീക്ഷണം തുടങ്ങി മറ്റനേകം വിശേഷങ്ങളും മെലീഹയിൽ സഞ്ചാരികളെ കാത്തിരിക്കുന്നുണ്ട്.

20% കിഴിവ്

വേനൽകാലം പ്രമാണിച്ച് മെലീഹയിലെ വിവിധ പാക്കേജുകൾക്ക് 20 ശതമാനം കിഴിവ് പ്രഖ്യാപിച്ചിട്ടുണ്ട്. കൂടുതൽ വിവരങ്ങൾക്കും ബുക്കിങ്ങിനുമായി 0502103780, 068 021 111 എന്നീ നമ്പരുകളിൽ ബന്ധപ്പെടുകയോ www.discovermleiha.ae  എന്ന വെബ്സൈറ്റ് സന്ദർശിക്കുകയോ ചെയ്യാം.