ഇനിയും തിരിച്ചറിഞ്ഞിട്ടില്ലാത്ത ജൈവികപഠന സാധ്യതകളുടെ ഇടമാണ് ഇന്ത്യ: പ്രണയ് ലാൽ 

ഷാർജ ∙ നൂറ്റാണ്ടുകളുടെ ജൈവിക ചരിത്രത്തെക്കുറിച്ചുള്ള ഇനിയും കണ്ടെടുത്തിട്ടില്ലാത്ത അവശേഷിപ്പുകൾ ഇന്ത്യയുടെ വിവിധ ഭാഗങ്ങളിൽ ഉണ്ടെന്ന് ബയോകെമിസ്റ്റും പരിസ്ഥിതി പ്രവര്‍ത്തകനുമായ പ്രണയ് ലാൽ. വിസ്മയകരമായ ജൈവ വൈവിധ്യമുള്ള മേഖലയാണിത്. എന്നാൽ, ആവശ്യമായ പഠനങ്ങൾ നടന്നിട്ടില്ല. 

'ഇൻഡിക- ഇന്ത്യൻ ഉപഭൂഖണ്ഡത്തിന്റെ ആഴത്തിലുള്ള സ്വാഭാവിക ജൈവിക ചരിത്രം' എന്ന തന്റെ പുസ്തകം ഷാർജ രാജ്യാന്തര പുസ്തകമേളയിൽ അവതരിപ്പിച്ച് ആസ്വാദകരോട് സംവദിക്കുകയായിരുന്നു അദ്ദേഹം.  ഇന്ത്യൻ ഉപഭൂഖണ്ഡത്തിന്റെ ഭൂമിശാസ്ത്രപരമായ പഠനങ്ങളെ മറികടന്ന്, സ്വാഭാവിക ജൈവിക ചരിത്രത്തിൽ ഊന്നിയുള്ള,  ഈ വിഷയത്തിലെ ഒരേയൊരു കൃതിയാണിതെന്നു നിരൂപകർ അഭിപ്രായപ്പെടുന്നു. അനൂപ് അവതാരകനായിരുന്നു. വിദ്യാർഥികളടക്കം ഒട്ടേറെ പേർ പങ്കെടുത്തു.