സയൻസ്, കൊമേഴ്സ് സ്ട്രീമുകളിൽ അമലും ഷഹനയും ഒന്നാമത്

അബുദാബി∙ ഹയർ സെക്കൻഡറി പരീക്ഷയിൽ സയൻസ്, കൊമേഴ്സ്  സ്ട്രീമിൽ യുഎഇയിൽ ഒന്നാമെത്തിയത് അബുദാബി മോ‍‍ഡൽ സ്കൂൾ വിദ്യാർഥികൾ. സയൻസിൽ 1200ൽ 1195 മാർക്കു നേടിയ കെ. അമൽ ഇമാൻ ആണ് യുഎഇയിൽ ഒന്നാം സ്ഥാനം നേടിയത്. പാലക്കാട് മണ്ണാർക്കാട് ചെങ്ങല്ലീരി  കരുണാകുറുശ്ശി സ്വദേശി അബുദാബിയിൽ ബിസിനസ് നടത്തുന്ന  റഫീഖിന്റെയും വീട്ടമ്മ ഷറീനയുടെയും മകളാണ്.

മാത്സ്, കെമിസ്ട്രി, ബയോളജി, ഹിന്ദി എന്നീ വിഷയങ്ങളിൽ 200ൽ 200 മാർക്കും നേടിയ അമലിന് ഫിസിക്സിൽ 198,  ഇംഗ്ലിഷിൽ 197 മാർക്കും ലഭിച്ചു. ഐ.ടി, ബയോമെഡിക്കൽ സയൻസ് എന്നിവയിൽ യുഎഇയിൽ തന്നെ ഉപരിപഠനം നടത്താനാണു  താൽപര്യമെന്ന് അമൽ മനോരമയോടു പറഞ്ഞു. കൊമേഴ്സിൽ 1192 മാർക്കു നേടിയാണ് എസ്.എൻ ഷഹന സ്കൂളിലും യുഎഇയിലും ഒന്നാം സ്ഥാനം കരസ്ഥമാക്കിയത്.

തിരുവനന്തപുരം ചിറയിൻകീഴ് പെരുങ്ങുഴി സ്വദേശിയും ഡിഎച്ച്എൽ ഉദ്യോഗസ്ഥനുമായ ഷഹൻഷയുടെയും അധ്യാപിക നഹ്‌ലയുടെയും മകളാണ്. എസിസിഎ (അസോസിയേഷൻ ഓഫ് ചാർട്ടേർഡ് സർട്ടിഫൈൻ അക്കൗണ്ടന്റ്) കോഴ്സ് എടുത്ത് തിരുവനന്തപുരത്ത് പഠിക്കാനാണ് താൽപര്യം.