സമ്മർ സർപ്രൈസ്: കൂറ്റൻ പാവകൾ ഉയർന്നു

ദുബായ്∙ വേനൽക്കാല ആഘോഷങ്ങളുടെ വരവറിയിച്ച് കൂറ്റൻ പാവകൾ എമിറേറ്റിലെ പ്രധാന കേന്ദ്രങ്ങളിൽ ഉയർന്നു. ബുർജ് ഖലീഫയുടെ മുകളിൽ നിന്ന് നിരങ്ങി ഇറങ്ങുന്ന ഫാൽക്കൺ പക്ഷിയും ദുബായ് ഫ്രെയിംസിനുള്ളിൽ പാറി പറക്കുന്ന ഡോനട്ട്സും മറീനയിലെ കടലിൽ നീന്തി തുടിക്കുന്ന തടിയൻ താറാവും ബുർജ് അൽ അറബിനെ ചുറ്റിത്തിരിയുന്ന ഭീമൻ തണ്ണിമത്തൻ കഷണവും വരാൻ പോകുന്ന വേനൽക്കാല സർപ്രൈസുകളുടെ സൂചനയാണ്.

ഭീമൻ രൂപങ്ങളുടെ വീഡിയോ ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും സമൂഹ മാധ്യമങ്ങളിൽ പങ്കുവച്ചു. ദുബായുടെ പ്രതീകങ്ങളായ വിനോദ സഞ്ചാര കേന്ദ്രങ്ങൾ സഞ്ചാരികളിലേക്കും താമസക്കാരിലേക്കും കൂടുതൽ പ്രചരിപ്പിക്കുന്ന പരിപാടികളാണ് സമ്മർ സർപ്രൈസുകളിൽ ഒളിഞ്ഞിരിക്കുന്നത്. അപ്രതീക്ഷിത സമ്മാനങ്ങളും പരിപാടിയുടെ ഭാഗമായി ഒരുക്കി.