ഇടിമിന്നലേറ്റ് സൗദിയിൽ യുവതി മരിച്ചു; സഹോദരിക്ക് പരുക്ക്

ജിസാൻ ∙ സൗദിയിൽ ഇടിമിന്നലേറ്റ് ഇരുപത്തിയേഴുകാരി മരിക്കുകയും സഹോദരിക്ക് പരുക്കേൽക്കുകയും ചെയ്തു. ജിസാൻ മേഖലയുടെ കിഴക്ക് അൽ അയ്ദാബി ഗവർണറേറ്റിലാണ് സംഭവം. വെള്ളിയാഴ്ച ഉച്ചയോടെയാണ് ഇടിമിന്നലുണ്ടായത്. 

ശക്തമായ മഴയും കാറ്റുമുണ്ടായ സമയത്ത് ഇവർ വീട്ടിലായിരുന്നു. തുടർന്നുണ്ടായ ഇടിമിന്നലിലാണ് അപകടം ഉണ്ടായതെന്ന് യുവതികളുടെ പിതാവ് പറഞ്ഞു. ഇരുവരേയും ഉടനെ അയ്ദാബി ജനറൽ ആശുപത്രിയിൽ എത്തിച്ചെങ്കിലും ഒരാൾ ആശുപത്രിയിൽ എത്തുന്നതിനു മുന്‍പേ മരിക്കുകയായിരുന്നു.