ബോട്ട് കപ്പലുമായി കൂട്ടിയിടിച്ചു; രാത്രിയിൽ ദുബായ് പൊലീസിന്‍റെ ഓപറേഷൻ, എട്ട് നാവികരെ രക്ഷപ്പെടുത്തി

ദുബായ്∙ മത്സ്യബന്ധന ബോട്ട് ചരക്ക് കപ്പലുമായി കൂട്ടിയിടിച്ചതിനെ തുടർന്ന് ദുബായ് പൊലീസ് രാത്രി വൈകി നടത്തിയ ഓപറേഷനിൽ എട്ട് നാവികരെ രക്ഷപ്പെടുത്തി.  സംഭവത്തിൽ ജീവനക്കാരിൽ മൂന്ന് പേർക്ക് പരുക്കേറ്റു. മത്സ്യബന്ധന ബോട്ട്  തകരുകയും ചെയ്തു. തുറമുഖ പൊലീസ് സ്റ്റേഷനും എയർ വിങ് സെന്‍ററും ചേർന്നാണ് നാവികരെ രക്ഷപ്പെടുത്തിയത്. പരുക്കേറ്റവരെ ഉടൻ വിമാനമാർഗം ദുബായിലെ റാഷിദ് ആശുപത്രിയിലെത്തിച്ച് ചികിത്സ നൽകി.  

എട്ട് നാവികരുമായി ദുബായ് ഫിഷ് മാർക്കറ്റ് വാട്ടർഫ്രണ്ടിലേക്ക് പോകുകയായിരുന്ന   ചരക്ക് കപ്പൽ മത്സ്യബന്ധന ബോട്ടുമായി കൂട്ടിയിടിച്ചായിരുന്നു അപകടമെന്ന് പോർട്ട് പൊലീസ് സ്റ്റേഷൻ ഡയറക്ടർ ബ്രി. ഡോ ഹസൻ സുഹൈൽ അൽ സുവൈദി പറഞ്ഞു.ചരക്ക് കപ്പൽ നിർത്തുന്നതിന് മുൻപ്, ബോട്ട് രണ്ട് നോട്ടിക്കൽ മൈൽ ഒഴുകാൻ നിർബന്ധിതമായതാണ് ബോട്ട് തകരാൻ കാരണമായത്. മൂന്ന് നാവികർക്ക് പരുക്കേൽക്കുകയും ചെയ്തു. അവരെ ഉടൻ തന്നെ ദുബായ് പൊലീസ് എയർ വിങ് റാഷിദ് ആശുപത്രിയിലേയ്ക്ക് കൊണ്ടുപോയി. 

മറൈൻ റെസ്ക്യൂ ടീമുകൾ ബാക്കിയുള്ള അഞ്ച് നാവികരെ രക്ഷപ്പെടുത്തി. ചരക്ക് കപ്പലിന് അതിന്‍റെ വലിയ വലിപ്പം കാരണം തുറമുഖത്ത് പ്രവേശിക്കാൻ കഴിഞ്ഞില്ല.  മറൈൻ റെസ്‌ക്യൂ ബോട്ടുകൾ വേഗത്തിൽ നാവികരെ കപ്പലിൽ നിന്ന് ഒഴിപ്പിക്കുകയും ശക്തമായ കാറ്റ് മൂലമുണ്ടായ ഉയർന്ന തിരമാലകളും വെല്ലുവിളികൾക്കിടയിലും അവരെ സ്റ്റേഷനിലേക്ക് മാറ്റുകയും ചെയ്തു.  

∙ കടലിൽ പോകുന്നവർക്ക് മുന്നറിയിപ്പ് 

കാലാവസ്ഥാ മുന്നറിയിപ്പുകൾ അവഗണിക്കുന്നതിനെതിരെ അധികൃതർ കടൽ യാത്രക്കാർക്ക് മുന്നറിയിപ്പ് നൽകി. പ്രത്യേകിച്ച് കടലിന്‍റെ അവസ്ഥ അതിവേഗം മാറുന്ന ഈ സമയത്ത് അപകട സാധ്യതയും വർദ്ധിപ്പിക്കുന്നുവെന്ന് വ്യക്തമാക്കി.  ദുബായ് പൊലീസ് ആപ്പിൽ ലഭ്യമായ 'സെയിൽ സേഫ്ലി' സേവനത്തിനായി റജിസ്റ്റർ ചെയ്യാൻ ബ്രി. അൽ സുവൈദി കപ്പൽ, ബോട്ട് ക്യാപ്റ്റൻമാരോട് ആഹ്വാനം ചെയ്തു. ഈ ഫീച്ചർ അവരെ അവരുടെ യാത്രാ പദ്ധതിയും പ്രതീക്ഷിക്കുന്ന ലക്ഷ്യസ്ഥാനങ്ങളും നൽകാനും ആവശ്യമെങ്കിൽ അടിയന്തര സഹായത്തിനും ലൊക്കേഷൻ ട്രാക്കിങ്ങിനും സൗകര്യമൊരുക്കുന്നു. ഉടനടിയുള്ള ദുരിത സിഗ്നലുകൾക്കായി സേവനത്തിൽ ഒരു എസ്ഒഎസ് ബട്ടൺ ഉൾപ്പെടുന്നുവെന്ന് അദ്ദേഹം പറഞ്ഞു.