സൗദി ഗ്രാൻപ്രിയിൽ മാക്സ് വേ​ർ​സ്റ്റപ്പൻ

ജിദ്ദ ∙ ഡച്ച് താരം മാക്സ് വേ​ർ​സ്റ്റപ്പന് ഫോർമുല വൺ സൗദി ഗ്രാൻപ്രിയിൽ കിരീടം. ജിദ്ദ കോർണീഷിലെ കാർ റേസ്​ സർക്യൂട്ടിൽ നടന്ന മത്സരത്തിലാണ്​ മൂന്ന് തവണ ലോക ചാംപ്യനായ റെഡ് ബുൾ താരം ജേതാവായത്​. തൊട്ടുമുമ്പ് നടന്ന ബഹ്​റൈൻ ഗ്രാൻപ്രിയിലും വേ​ർ​സ്റ്റപ്പനായിരുന്നു ജേതാവ്. കായിക മന്ത്രി അമീർ അബ്​ദുൽ അസീസ് ബിൻ തുർക്കി അൽഫൈസൽ താരത്തെ കിരീടമണിയിച്ചു. റെഡ്ബുളിലെ സഹതാരം സെർജിയോ പെരസാണ്​ രണ്ടാം സ്ഥാനത്ത് ഫിനിഷ് ചെയ്തത്. ഫെരാരി ഡ്രൈവർ ചാൾസ് ലെക്ലർക്ക് മൂന്നാമതെത്തി.

ഇൻറർനാഷനൽ ഓട്ടോമൊബൈൽ ഫെഡറേഷൻ (എഫ്.ഐ.എ) പ്രസിഡന്റ് മുഹമ്മദ് ബിൻ സുലൈം, ഫോർമുല വൺ പ്രസിഡൻറും സിഇഒയുമായ സ്​റ്റെഫാനോ ഡൊമെനിക്കലി, എസ്ടിസി ഗ്രൂപ്പ് സിഇഒ എൻജി. ഉലയാൻ അൽവതീദ്, അരാംകോ സിഇഒ എൻജി. അമീൻ നാസർ എന്നിവർ സംബന്ധിച്ചു.