പ്രവാസി വോട്ടർമാരെ നേരിൽക്കണ്ട് വോട്ടഭ്യർഥിക്കാൻ ഷാഫി പറമ്പിൽ ഇന്ന് യുഎഇയിൽ

ദുബായ് ∙ ലോക്സഭാ തിരഞ്ഞെടുപ്പു പ്രചാരണത്തിന്റെ ആവേശം യുഎഇയിലും. പ്രവാസി വോട്ടർമാരെ നേരിൽക്കണ്ട് വോട്ടഭ്യർഥിക്കാൻ ആദ്യമെത്തുന്നതു വടകരയിലെ യുഡിഎഫ് സ്ഥാനാർഥി ഷാഫി പറമ്പിലാണ്. ഷാഫിയുടെ പ്രചാരണ വാഹനം ഇന്ന് ഷാർജ ഇന്ത്യൻ അസോസിയേഷനിൽ എത്തും. 8.30നാണ് പൊതുസമ്മേളനം. പ്രവാസികളുമായി ആശയ വിനിമയം നടത്തുകയാണ് ലക്ഷ്യം. 

നാട്ടിൽ വോട്ടെടുപ്പിൽ പങ്കെടുക്കാൻ പ്രവാസികൾ കൂട്ടത്തോടെ ടിക്കറ്റ് ബുക്ക് ചെയ്തു തുടങ്ങിയിട്ടുണ്ട്. കെഎംസിസി, ഇൻകാസ് എന്നിവരുടെ നേതൃത്വത്തിലാണ് ഇതിനുള്ള തയാറെടുപ്പുകൾ നടത്തുന്നത്. ഇത്തവണ സംഘടനയായി ഒരുമിച്ച് ആളുകളെ കൊണ്ടു പോകുന്നില്ലെങ്കിലും അംഗങ്ങൾ വ്യക്തിപരമായി നാട്ടിലേക്കു ടിക്കറ്റുകൾ ബുക്ക് ചെയ്തു തുടങ്ങി. ഷാഫിയുടെ സ്വീകരണത്തിനായി കെ.പി. മുഹമ്മദ് പേരോട് ചെയർമാനായും ഇക്ബാൽ ചെക്യാട് ജനറൽ കൺവീനറായും സ്വാഗത സംഘം രൂപീകരിച്ചു.