പ്രവാസികൾക്ക് തിരിച്ചടി; കൺസൾട്ടിങ് മേഖലയിൽ സൗദിവൽക്കരണത്തിന്‍റെ രണ്ടാം ഘട്ടം പ്രാബല്യത്തിൽ

റിയാദ്  ∙ കൺസൾട്ടിങ്‌ സേവന മേഖലയിലെ സൗദിവൽക്കരണത്തിന്‍റെ രണ്ടാം ഘട്ടം കഴിഞ്ഞ ദിവസം  മുതൽ പ്രാബല്യത്തിൽ വന്നതായി മാനവ വിഭവശേഷി, സാമൂഹിക വികസന മന്ത്രാലയം അറിയിച്ചു. ബന്ധപ്പെട്ട  തൊഴിൽ മേഖലയിൽ 40 ശതമാനമാണ് സൗദിവൽക്കരണം. സൗദി അറേബ്യയിലെ വിവിധ പ്രദേശങ്ങളിലെ പൗരന്മാർക്കും സ്ത്രീകൾക്കും കൂടുതൽ ഉത്തേജകവും ഉൽപാദനക്ഷമവുമായ തൊഴിലവസരങ്ങൾ ലഭ്യമാക്കുകയെന്ന ലക്ഷ്യത്തോടെയുള്ള മന്ത്രാലയത്തിന്‍റെ ശ്രമങ്ങളുടെ ഭാഗമാണ് ഈ നീക്കം.

ഫിനാൻഷ്യൽ കൺസൾട്ടിങ്‌ സ്പെഷ്യലിസ്റ്റ്, ബിസിനസ് കൺസൾട്ടിങ്‌ സ്പെഷ്യലിസ്റ്റ്, സൈബർ സെക്യൂരിറ്റി കൺസൾട്ടിങ്‌ സ്പെഷ്യലിസ്റ്റ്, മാനേജർ ഓഫ് പ്രോജക്ട് മാനേജ്മെന്‍റ്, പ്രോജക്ട് മാനേജ്മെന്‍റ്  എൻജിനീയർ, പ്രോജക്ട് മാനേജ്മെന്‍റ്  സ്പെഷ്യലിസ്റ്റ് തുടങ്ങിയവരാണ് രണ്ടാം ഘട്ടത്തിൽ കൺസൾട്ടിങ്‌ സേവനങ്ങളുടെ സൗദിവൽക്കരണത്തിന് കീഴിലുള്ള പ്രധാന തൊഴിലുകൾ എന്ന് മന്ത്രാലയം വെളിപ്പെടുത്തി. തൊഴിൽ വിപണിയിൽ സൗദികളുടെ പങ്കാളിത്തം ഉയർത്തുന്നതിനായി ഈ തൊഴിലുകളുടെ രണ്ടാം ഘട്ട സൗദിവൽക്കരണത്തിന്‍റെ തുടർനടപടികളും നടപ്പാക്കലും പ്രവർത്തിക്കുമെന്നും  ധനമന്ത്രാലയവുമായി സഹകരിച്ച് പ്രവർത്തിക്കുമെന്നും മന്ത്രാലയം അറിയിച്ചു.

സൗദികൾക്ക് കൂടുതൽ ഉത്തേജകവും ഉൽപാദനക്ഷമവുമായ തൊഴിലവസരങ്ങൾ നൽകുന്നതിനും തൊഴിൽ വിപണിയിൽ അവരുടെ പങ്കാളിത്തം ഉയർത്തുന്നതിനും ലക്ഷ്യമിട്ടാണ് മന്ത്രാലയം, മറ്റ് മന്ത്രാലയങ്ങളുമായും മേൽനോട്ട അധികാരികളുമായും സഹകരിച്ച് സൗദിവൽക്കരണ പ്രക്രിയ ആരംഭിച്ചത്. സൗദിയിലെ യുവാക്കൾക്കും സ്ത്രീകൾക്കും കൂടുതൽ തൊഴിലവസരങ്ങൾ സൃഷ്ടിക്കുക എന്ന ലക്ഷ്യത്തോടെയുള്ള മന്ത്രാലയത്തിന്‍റെ ശ്രമങ്ങളുടെ തുടർച്ചയാണിത്, കൂടാതെ രാജ്യത്തിന്‍റെ വിവിധ പ്രദേശങ്ങളിൽ അവർക്ക് ഉത്തേജകവും ഉൽപ്പാദനപരവും സുസ്ഥിരവുമായ തൊഴിൽ അന്തരീക്ഷം പ്രദാനം ചെയ്യുന്നു. തൊഴിൽ വിപണിയിലെ അവരുടെ പങ്കാളിത്തത്തിന്‍റെ നിലവാരം ഉയർത്താനും സാമ്പത്തിക വ്യവസ്ഥയിൽ അവരുടെ സംഭാവന വർധിപ്പിക്കാനും ഇത് ലക്ഷ്യമിടുന്നു. ഇതോടെ ഈ മേഖലയിൽ ജോലി ചെയ്യുന്ന പ്രവാസികൾക്ക് തൊഴിൽ നഷ്ടപ്പെടുന്നതിന് സാധ്യതയുണ്ട്.