മനുഷ്യക്കടത്ത് ഇല്ലാതാക്കാൻ യുഎഇ പ്രതിജ്ഞാബദ്ധമാണെന്ന് നീതിന്യായ മന്ത്രി

അബുദാബി ∙ മനുഷ്യക്കടത്ത് ഇല്ലാതാക്കാൻ യുഎഇ പ്രതിജ്ഞാബദ്ധമാണെന്ന് നീതിന്യായ മന്ത്രി അബ്ദുല്ല ബിൻ സുൽത്താൻ ബിൻ അവദ് അൽ നുഐമി പറഞ്ഞു. എല്ലാ വർഷവും ജൂലൈ 30ന് മനുഷ്യക്കടത്തിനെതിരെ ലോകദിനം ആചരിക്കേണ്ടതിന്റെ പ്രാധാന്യം വലുതാണ്.  ഈ കുറ്റകൃത്യത്തെ ഫലപ്രദമായി ചെറുക്കുന്നതിനും അത് ചെയ്യുന്നവരെ പിടികൂടുന്നതിനുമായി പ്രാദേശിക, ആഗോള തലങ്ങളിൽ അവബോധം വർധിപ്പിക്കുന്നതിന് ഈ ദിനം സഹായിക്കുന്നു.   

നിരപരാധികൾ, പ്രത്യേകിച്ച് കുട്ടികൾ ഇരകളാകുന്നത് തടയുക, കുറ്റകൃത്യങ്ങൾ നിരീക്ഷിക്കുന്നതിനും ഇരകളിൽ നിന്ന് റിപോർട്ടുകൾ സ്വീകരിക്കുന്നതിനും ആധുനിക സാങ്കേതികവിദ്യ പ്രയോജനപ്പെടുത്തുക എന്നതാണ് ലക്ഷ്യം.  ദേശീയ കമ്മിറ്റിയുടെ ശ്രമങ്ങൾ മനുഷ്യക്കടത്ത് കുറ്റകൃത്യങ്ങളെ ചെറുക്കുന്നതിന് 2023-ൽ ഒരു പുതിയ നിയമം നടപ്പിലാക്കുന്നതിലേയ്ക്ക് നയിച്ചു, അത് ഇരകളെ സംരക്ഷിക്കുന്നതിനായി സേവനങ്ങൾ സ്ഥാപിക്കുകയും കുറ്റവാളികൾക്ക് ശിക്ഷകൾ ചുമത്തുകയുമുണ്ടായി. പ്രത്യേകിച്ച് ഇര കുട്ടിയായിരിക്കുമ്പോൾ മനുഷ്യക്കടത്ത് നടത്തുന്നവർക്കുള്ള കഠിനമായ ശിക്ഷകളും നിയമം ഊന്നിപ്പറയുന്നു.