ഷാർജയിൽ മത്സ്യോത്സവം 29 മുതൽ

ഷാർജ ∙ ദിബ്ബ അൽ ഹിസനിലെ മത്സ്യോൽസവത്തിന് 29നു തുടക്കമാകും. ദിബ്ബയിലെ പൂർവികരുടെ പരമ്പരാഗത തൊഴിലിനെയും മത്സ്യബന്ധനത്തിലെ വൈദഗ്ധ്യത്തെയും ആദരിക്കുന്നതിന്റെ ഭാഗമായാണ് മേള നടത്തുന്നത്.

അൽ മലേഹ് ഉൽപന്നങ്ങളെ പ്രോൽസാഹിപ്പിക്കുക പരിപാടിയുടെ ലക്ഷ്യമാണ്. സർക്കാർ സ്ഥാപനങ്ങൾ, സ്വകാര്യ കമ്പനികൾ, കടകൾ ഉൾപ്പെടെ മേളയിൽ പങ്കെടുക്കും. മത്സ്യ ബന്ധന മേഖലയിൽ ജോലി ചെയ്യുന്നവരും കുടുംബങ്ങളും എത്തും. ഷാർജ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി സംഘടിപ്പിക്കുന്ന മേള സെപ്റ്റംബർ ഒന്നിന് സമാപിക്കും.