സൗദി ദേശീയ ദിനാഘോഷം ദുബായ് വിമാനത്താവളത്തിൽ: പച്ചയിൽ പ്രകാശിച്ച് സ്മാർട് ഗേറ്റുകൾ

ദുബായ് ∙ സൗദിയുടെ 94-ാമത് ദേശീയ ദിനാഘോഷം ദുബായിൽ. ഇന്ന് നടന്ന ആഘോഷത്തിന്‍റെ ഭാഗമായി ദുബായ് രാജ്യാന്തര വിമാനത്താവളത്തിൽ ഒട്ടേറെ പരിപാടികളും നടന്നു. ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സിന്‍റെ ആഭിമുഖ്യത്തിലായിരുന്നു പരിപാടി.

യുഎഇ-സൗദി ബന്ധത്തിന്‍റെ ശക്തിയും സാഹോദര്യവും മുന്നോട്ട് വയ്ക്കുന്ന ആഘോഷം സ്മാർട്ട് ഗേറ്റുകൾ പച്ച നിറത്തിൽ പ്രകാശിപ്പിച്ചും കാർട്ടൂൺ കഥാപാത്രങ്ങളായ സാലമും സലാമയും കുട്ടികളുമായി സംവദിച്ചും ഗംഭീരമാക്കി. ദുബായ് എയർപോർട്ടിലെ പാസ്‌പോർട്ട് കൺട്രോൾ മേഖലയിൽ സൗദി സന്ദർശക്കാരെ പൂക്കളും അറബിക് കോഫിയും ഈന്തപ്പഴവും നൽകിയാണ് രാജ്യത്തേയ്ക്ക് സ്വീകരിച്ചത്.

എയർപോർട്ടിലെ ഫ്രണ്ട്‌ലൈൻ ഉദ്യോഗസ്ഥർ ഇരുരാജ്യങ്ങളുടെയും പതാകകൾ പതിച്ച ഷാളുകളും അണിഞ്ഞിരുന്നു. കൂടാതെ സന്ദർശകരുടെ പാസ്പോർട്ടിൽ "#UAE_Saudi_Together_Forever" എന്ന് മുദ്ര ചെയ്ത പ്രത്യേക സ്റ്റാംപും പതിപ്പിച്ചു. കൂടാതെ ഡു –വിന്‍റെ സൗജന്യ സിം കാർഡും  സമ്മാനപ്പെട്ടികളും വിതരണം ചെയ്തു.

ജിഡിആർഎഫ്എ ദുബായ് തലവൻ ലഫ്. ജനറൽ മുഹമ്മദ്‌ അഹ്‌മദ്‌ അൽ മർറി യുഎഇ-സൗദി സൗഹൃദത്തിന്‍റെ ആഴവും തന്ത്രപരമായ പങ്കാളിത്തവും എടുത്തുപറഞ്ഞു . സൗദി സന്ദർശകർക്ക് എല്ലാ പിന്തുണയും വാഗ്ദാനം ചെയ്യുന്നുവെന്നും ഇരുരാജ്യങ്ങളും തമ്മിലുള്ള ബന്ധം വളരെ ശക്തമാണെന്നും അദ്ദേഹം കൂട്ടിച്ചേർത്തു.